iPhone ишлаб чиқарилишида инқилобий ўзгариш бўлади – манба

Apple корпорацияси iPhone линиясида кейинги уч йил давомида босқичма-босқич жорий этиладиган кенг кўламли ўзгаришларга тайёргарлик кўрмоқда. Бу ҳақда “Bloomberg” шарҳловчиси Марк Гурман хабар берди.

Биринчи босқич iPhone 17 Air моделининг чиқарилиши бўлади. У жорий йилнинг сентябрида тақдим этилади. Смартфон iPhone 16 Plus’нинг вориси бўлиб, ўта юпқа ва минималистик қурилма сифатида тақдим этилади. iPhone 17 Air битта орқа камера, Apple ишлаб чиқарган модем, кичрайтирилган аккумуляторга эга бўлади. Шунингдек, жисмоний SIM-карта слотидан воз кечилади ҳамда фақат eSIM  қўллаб-қувватланади.

Иккинчи босқич – 2026 йилда Apple илк букиладиган қурилмани тақдим этишни режалаштирмоқда. Смартфон тўртта камерага эга бўлади, жумладан, икки асосий модуль, шунингдек ташқи ва ички экранларда сенсорлар ўрнатилади. Бу моделда Apple C2 модеми ва in-cell туридаги янги авлод дисплейи пайдо бўлиб, у сенсор сезгирлигини яхшилаши ва букилиш жойидаги чизиқ кўринишини камайтириши керак.

Учунчи босқич – 2027 йилга бориб Apple бренднинг 20 йиллигига бағишлаб юбилей смартфон – iPhone 20 ни тайёрламоқда. Марк Гурманнинг сўзларига кўра, қурилма тубдан янгиланган ташқи кўринишга эга бўлади. Хусусан, у эгри ойнали корпус ва буткул қайта ишланган дизайн билан бу бутун линия тарихидаги энг муҳим ўзгаришни ўзида жам қилади.

Эслатиб ўтамиз, аввалроқ iPhone’нинг янги авлодини тақдим этишга бағишланган Apple’нинг йиллик тадбири жорий йилнинг 9 сентябрь куни бўлиб ўтиши эълон қилинган эди. Тақдимот Калифорниянинг Купертинодаги Apple штаб-квартирасида жойлашган Стив Жобс театрида ўтказилади ва маҳаллий вақт билан соат 10:00 да (Тошкент вақти билан 22:00 да) бошланади.