Исроил Ғазо секторидаги ҳарбий базаларини кенгайтирмоқда

Исроил Ғазо секторида ҳарбий иштирокини кучайтиришда давом этмоқда. Спутник тасвирлари анклав ҳудудида янги ҳарбий объектлар қурилаётганини кўрсатмоқда. Бу ҳақда “Al Jazeera” хабар берди.

Телеканал томонидан ўрганилган 2026 йил май ойигача бўлган спутник суратларига кўра, Ғазо секторида Исроилга тегишли 40 та ҳарбий объект аниқланган. Уларнинг саккизтаси 2025 йил октябрь ойида кучга кирган ўт очишни тўхтатиш режими жорий этилганидан кейин қурилган. Яна бир объектда қурилиш ишлари ҳозир ҳам давом этмоқда.

Таҳлилчиларнинг таъкидлашича, мазкур иншоотлар вақтинчалик кузатув нуқталари эмас, балки узоқ муддатли фойдаланишга мўлжалланган тўлиқ ҳарбий инфратузилма ҳисобланади. Янги базалар ҳарбий техника жойлаштириш майдонлари, муҳандислик иншоотлари ва шахсий таркибни жойлаштириш объектлари билан жиҳозланмоқда.

Ҳарбий постлар анклавнинг турли ҳудудларига жойлаштирилган. Иккита объект сектор шимолида, яна иккитаси марказий қисмида жойлашган. Битта пост Нецарим коридорининг шарқий қисмида бўлса, учта база жанубдаги Хон-Юнис шаҳри атрофида қурилган.

Тергов материалларида Хон-Юнисдаги Шарқий қабристон ўрнида барпо этилган объектга алоҳида эътибор қаратилган. Спутник кузатувлари маълумотларига кўра, бу ҳудудда муҳандислик ишлари 2025 йил ноябрь ойида бошланган. 2026 йил май ойига келиб эса мазкур майдон ҳарбий техника ва аскарларни жойлаштириш инфратузилмасига эга тўлиқ ҳарбий базага айлантирилган.

Шунга ўхшаш жараёнлар анклавнинг шимолий қисмида ҳам кузатилган. Байт-Лаҳия ҳудудида 2025 йил октябрида ҳарбий иншоотлардан холи бўлган майдон бир неча ҳафта ичида кенг кўламли муҳандислик ишлари ва янги объектлар қурилиши майдонига айланган.

Ҳарбий инфратузилманинг кенгайиши Исроил Бош вазири Биньямин Нетаньяҳунинг Ғазо сектори устидан назоратни янада кучайтириш ҳақидаги баёнотлари фонида кузатилмоқда. Унинг сўзларига кўра, Исроил кучлари ҳозирда анклав ҳудудининг қарийб 60 фоизини назорат қилмоқда. Исроил бўлинмалари асосан секторнинг катта қисмини қамраб олган буфер ҳудуд – «сариқ чизиқ» бўйлаб жойлаштирилган.

Спутник кузатувларининг янги маълумотлари Исроилнинг Ғазодаги ҳарбий иштироки тобора мустаҳкам тус олаётганини кўрсатмоқда. Бу эса можарони тинч йўл билан ҳал этиш истиқболлари ва ҳудуднинг келажакдаги мақомига таъсир кўрсатиши мумкин.

Эслатиб ўтамиз, аввалроқ Биньямин Нетаньяҳу Исроил мудофаа армиясига (ЦАҲАЛ) Ғазо сектори ҳудуди устидан назоратни 70 фоизгача кенгайтириш ҳақида буйруқ берганди.