Исроил хавфсизлик ортидан эмас, ҳудуд ортидан қувмоқда – Фидан

Туркия Ташқи ишлар вазири Ҳоқон Фидан Исроилнинг ҳаракатлари хавфсизлик учун эмас, балки ҳудуд учун қилинаётганини айтди. Бу ҳақда у бугун, 18 апрель куни Анталия дипломатик форумидаги маърузасида сўз очди.

Фидан бугунги даврда дипломатия ҳар қачонгидан ҳам муҳим ва унга эҳтиёж яна-да ортаётганини таъкидлаган.

“Биз энди халқаро тизимда миллий давлатларнинг аҳамияти тобора ошиб бораётганини кўряпмиз. Шу жиҳатдан давлатлар учун дипломатия яна-да муҳим аҳамият касб этмоқда. Агар биз одатдагидек тизим ўз йўлида кетади деб кутаверсак, аввал урушни, кейин эса вайронагарчиликни кўрамиз. Исроил ўз хавфсизлиги ортидан қувлаётгани йўқ, балки кўпроқ ҳудуд ортидан қувмоқда”, дейди Ҳоқон Фидан.

Шунингдек, у вазиятни яна-да мураккаблаштираётган жиҳат сифатида Исроил Европа ва АҚШдан жуда катта қўллаб-қувватлов олаётганини айтган.

“Минтақа давлатлари эса янги уйғониш даврининг бошида турибди. Улар Исроил минтақавий таҳдид эканини англаб етмоқда. Европа Иттифоқи эса институционал тарзда бирлашиб, ўз кучидан фойдаланиб, Исроил фаолиятини чеклаш борасида қатъий позиция намойиш этмаяпти”, дейди у.

Бундан ташқари, Фидан АҚШни танқид остига олган. Маърузасида у Иккинчи жаҳон урушидан кейин АҚШ янги дунё тартибининг етакчисига айланганини, аммо кейинги даврда бу янги тизимнинг яратувчиси ўзи яратган тизимга мос келмай қолганини таъкидлаб ўтган.

Эслатиб ўтамиз, аввалроқ Туркия Президенти Ражаб Тойиб Эрдўған ҳомийлигида ва мамлакат Ташқи ишлар вазирлиги мезбонлигида 17–19 апрель кунлари Анталия дипломатик форуми ўтказилиши хабар қилинганди.