Қозоғистон Россиядан чўчқа гўшти импортини оширди

Қозоғистон 2025 йилда Россия чўчқа гўштининг энг тез ўсаётган импортчиларидан бирига айланди. Бу ҳақда Россия Қишлоқ хўжалиги экспортини ривожлантириш федерал маркази маълум қилди.

Қайд этилишича, Россия 2025 йилнинг дастлабки 10 ойида 324 минг тоннадан ортиқ чўчқа гўшти экспорт қилган. Бу ўтган йилга нисбатан 26% кўп. Йил охирига келиб экспорт ҳажми 400 минг тоннага яқинлашиши, экспорт қиймати эса қарийб 1 миллиард долларга етиши прогноз қилинмоқда.

Россия чўчқа гўшти маҳсулотлари бўйича импорт бозорларида энг катта ўсиш Хитойда қайд этилди – 84%. Қозоғистон эса иккинчи ўринни эгаллаб, минтақадаги энг фаол харидорлардан бирига айланди. Шунингдек, Беларусь 33%, Арманистон 14%  ва Вьетнамда 13% ўсиш кузатилган.

Марказ бош директори Юрий Ковалёв Хитой бозорида ишлашдаги қийинчиликларга қарамай, Хитой аллақачон Россия чўчқа гўштининг энг яхши учта харидорига айланганини маълум қилди.

Эслатиб ўтамиз, аввалроқ Қирғизистонда гўшт нархига давлат назорати ўрнатилгани ҳақида хабар берилганди. Давлат назорати ўрнатилишидан мақсад – гўшт нархининг ошишига йўл қўймаслик, чорвани чегарадан олиб кириш ва олиб чиқишни назорат қилиш ҳамда экспортга сон жиҳатидан чеклов киритиш.