“Камп Ноу”да Чемпионлар лигаси ўйини ўтказиладиган бўлди

UEFA “Барселона”га Чемпионлар лигаси доирасидаги “Айнтрахт Франкфурт” билан ўйинни “Камп Ноу”да ўтказиш учун рухсат берди. Бу ҳақда “Мундо deportivo” нашри хабар берди.

Манбага кўра, UEFA қарори 45 401 томошабинга мўлжалланган ён стендни очишга имкон берувчи 1Б босқич лицензияси тақдим этилганидан кейин қабул қилинган. Турнир регламентининг 25.08-бандида гуруҳ босқичида стадионни ўзгартириш тақиқлангани кўрсатилган бўлса-да, UEFA “Барселона”нинг талабини инобатга олган. Клубнинг уйига қайтиши таъмирлаш ишлари билан боғлиқ кутилмаган ҳолат сабабли амалга ошмоқда ва бу устунлик сифатида қабул қилинмайди.

Шунингдек, UEFA ўйинда жонли аудитория ва меҳмон мухлислари учун стадион сиғимининг 5 фоизини ажратишни талаб қилган. UEFA инспекторлари жорий йилнинг 29 ноябрь куни “Алавес”га қарши ўйинда барча хавфсизлик ва оператив тафсилотларни текшириш учун “Камп Ноу”да бўлади.

“Айнтрахт Франкфурт”га қарши ўйинга чипталар яқин кунларда сотувга чиқади ва абонемент эгалари ушбу ўйиндан қўшимча тўловларсиз баҳраманд бўлишлари мумкин.

Маълумот учун, “Барселона” Чемпионлар лигаси доирасидаги “Камп Ноу”да охирги марта 2022 йил 26 октябрда “Бавария”га қарши ўтказган эди. Орадан 1140 кун ўтиб, жамоа яна ўзининг асосий стадионида Чемпионлар лигаси ўйинини ўтказади.

Эслатиб ўтамиз, аввалроқ “Барселона” жамоаси икки йилдан ортиқ танаффусдан сўнг жорий йилнинг 22 ноябрь куни Ла Лига доирасида “Атлетик Билбао”га қарши учрашувда ўзининг қайта қурилган “Камп Ноу” стадионига қайтишини маълум қилган эди.