Канада Жаҳон чемпионати олдидан виза назоратини кучайтиради

 Канаданинг Иммиграция, қочқинлар ва фуқаролик вазирлиги 2026 йилги Жаҳон чемпионати муносабати билан мамлакатга кириш учун топширилаётган виза аризаларини янада қатъий кўриб чиқмоқда. Бу ҳақда “The Globe and Mail” хабар берди.

Маълум қилинишича, чоралар чемпионат даврида бошпана сўровчилар сонининг ошиб кетишининг олдини олишга қаратилган. Футбол учрашувларини томоша қилишни режалаштираётган айрим мухлисларнинг Жаҳон чемпионати баҳонасида Канадага кириб, кейинчалик бошпана сўраши эҳтимоли расмийларни хавотирга солмоқда.

Агар миграция хизмати ходимлари ариза топширган шахс чемпионат якунлангач ўз мамлакатига қайтмаслиги мумкин, деган хулосага келса, ҳатто чипта сотиб олинган бўлса ҳам виза бериш ёки мамлакатга киришга рухсат рад этилиши мумкин.

“Иммиграция, қочқинлар ва фуқаролик департаменти FIFA тадбирлари билан боғлиқ бўлиши мумкин бўлган бошпана сўровларини диққат билан кузатиб боради.  FIFA чемпионатлари бошпана олиш йўли эмас”, дейди департамент вакили Изабель Дюбуа.

Маълумот учун, Жаҳон чемпионати жорий йилнинг 11 июндан 19 июлгача АҚШ, Канада ва Мексика мезбонлигида бўлиб ўтади. 

Эслатиб ўтамиз, аввалроқ Ўзбекистон миллий терма жамоаси Жаҳон чемпионатига тайёргарлик кўриш жараёнида 2026 йилнинг 1 июнь куни мундиал мезбони Канадага қарши ўртоқлик учрашуви ўтказиши маълум қилинган эди.