“Крокус”даги террорда айбланаётганлар учун умрбод қамоқ сўралди

Россия прокуратураси Москва вилоятидаги “Крокус Сити Холл”даги террор ҳужуми иши бўйича 15 айбланувчи, жумладан жиноятни бевосита амалга оширган тўрт шахс учун умрбод қамоқ жазоси қўллашни талаб қилди. Бу ҳақда “Interfax” хабар қилди.

Маълум қилинишича, жабрланувчилар адвокати Людмила Аиварнинг айтишича, бошқа айбланувчиларга 19 йилдан 22 йилгача колонияда жазо сўралган. Шунингдек, прокуратура ишдаги қолган шахслар учун 500 мингдан 2,7 миллион рублгача жарима ҳам қўлланишини талаб қилган.

Уларга террорчилик, террорчилик фаолиятига ёрдам бериш, террорчилик мақсадида тайёргарлик ва бошқа жиноятларда айблов қўйилган.

Россия Бош прокуратураси маълумотига кўра, ҳужум оқибатида 147 киши ҳалок бўлган, 336 киши жароҳат олган, 3 киши йўқолган. Келтирилган зарар 5,7 миллиард рублни ташкил қилган.

Маълумотларга кўра, ҳужумни тайёрлаш, молиялаштириш, амалга ошириш ва қочиш ҳаракатлари “Вилоят Хорасан” гуруҳининг аъзолари томонидан интернет орқали мувофиқлаштирилган.

Россия тергов қўмитаси расмий вакили Светлана Петренконинг айтишича, Марказий Осиёдан чиққан олти шахс ушбу ҳужумни уюштиришда гумон қилиниб, улар қидирувга берилган.

Хабарга кўра, ҳужум учун Д. Мирзоев, М. Файзов, Ш. Фаридуни ва С. Рачабализодани ёлланган.  Бундан ташқари, иш бўйича бир қатор айбланувчилар Доғистоннинг Каспийск шаҳридаги кўнгилочар мажмуани портлатишни режалаштирган. Ҳужумдан сўнг тўрт ижрочи Украинага қочишга уринган, аммо Брянск вилоятида ушланган.

Маълумот учун, Москва яқинидаги Красногорскдаги “Крокус Сити Холл” концерт залига ҳужум 2024 йилнинг 22 март куни тахминан соат 20:00 да содир бўлганди. Тўрт нафар қуролли шахс концертга келган одамларга қарата ўқ узган, аудиторияга ўт қўйган, сўнг бинони тарк этиб, машинада қочиб кетган. Оқибатда 145 киши ҳалок бўлди, 500 дан ортиқ киши яраланди. 1,7 мингдан ортиқ киши жабрланувчи сифатида тан олинган, 800 дан ортиқ киши гувоҳ сифатида сўроқ қилинган.

Ўтган йилнинг 1 ноябрь куни ушбу терактда гумон қилинган яна 4 нафар шахс аниқланди. Уларнинг барчаси мамлакат таркибидаги Ингушетия Республикаси фуқаролари. Улардан икки нафари ҳибсга олинган, яна икки нафари қидирувга берилган. Гумонланувчилар – Ҳусайн Медов, Жаброил Аушев ва Хаваж-Багаудин Алиев Назран туманининг Сурхахи қишлоғида туғилган ва шу қишлоқда рўйхатда туради. Қолган бир нафар гумонланувчи – Ботир Кулаев эса Экажево қишлоғидан экани қайд этилган. Медов (астма касали бор, 2-гуруҳ ногирони) ва Аушев ушланиб, Москвага олиб кетилган. Улар терактда иштирок этганини рад этган, бироқ қурол ва ўқ-дориларнинг ноқонуний савдосига алоқадорлигини тан олган. Алиев ва Кулаев қидирувга берилган.

Ушбу ҳужум замонавий Россия тарихидаги энг йирик терактлардан бирига айланди, ИШИДнинг Афғонистондаги бўлими бўлган “Вилоят Хуросон” гуруҳи ҳужум учун жавобгарликни ўз зиммасига олди.

Эъзоза Олимова