Кубада ёнилғи бутунлай тугаб қолди

Куба энергетика тизими Америка блокадаси туфайли критик ҳолатда қолмоқда. Мамлакатда ёнилғи захиралари бутунлай тугади. Бу ҳақда Куба Энергетика вазири Висенте де ла О Леви “Mesa Redonda” теледастури эфирида маълум қилди.

Левининг билдиришича, захиралар жорий май ойининг бошига келиб тугаган. Уларни ойнинг дастлабки кунларигача етказишга муваффақ бўлинган.

“Бизда мазут ҳам мутлақо қолмади. Дизель ёнилғиси ҳам бизда мутлақо йўқ... Ягона эга бўлган нарсамиз – бу ўз конларимиздан чиқаётган йўлдош газ ва миллий нефтимиздир, унинг қазиб олиниши ҳам ўсиб бормоқда”, дейди у.

Вазирнинг фикрича, мамлакатнинг энергия ташувчиларга бўлган эҳтиёжини бир марталик етказиб беришлар билан қоплаб бўлмайди. Унинг сўзларига кўра, шахсий нефть ва йўлдош газ қазиб олиш ички талабнинг фақат бир қисминигина қоплайди, холос.

Унинг айтишича, пойтахтда электр таъминотидаги узилишлар суткасига 20–22 соатга етмоқда, ўчиришлар оралиғидаги чироқ бериладиган вақт эса атиги бир неча соат давом этиши мумкин.

Қайд этиш жоиз, Гаванада сўнгги ўн йилликлардаги энг кенг кўламли режали электр узилишлари содир бўлди. Пойтахтнинг бир неча туманларида норозилик намойишлари бўлиб ўтди, унда “Чироқни ёқинг!” ва “Бирлашган халқ ҳеч қачон енгилмайди!” каби шиорлар янгради.

Бунгача Куба Президенти Мигель Диас-Канель X ижтимоий тармоғидаги саҳифасида сўнгги кунларда энергетика тизимидаги вазият “жуда таранг” эканини ёзган. У бунга сабаб қилиб АҚШ томонидан ўрнатилган энергетик блокадани кўрсатган. 

“Бугунги кунда тиғиз вақтларда ёки тунги юклама пайтида 2000 МВтдан ортиқ дефицит (тақчиллик) прогноз қилинмоқда”, дейди Диас-Канель.

Эслатиб ўтамиз, жорий йил январь ойи охирида АҚШ Президенти Дональд Трамп Куба томонидан миллий хавфсизликка таҳдид туфайли фавқулодда ҳолат режимини жорий қилган эди. Бу Вашингтонга оролга тўғридан тўғри ёки билвосита нефть етказиб берувчи давлатлардан импорт қилинадиган маҳсулотларга қўшимча божлар солиш имконини берди. Ўшандан бери Куба бир неча бор тўлиқ электрсиз қолиш (блэкаут) ҳолатларини бошдан кечирди: оролда кунлик эҳтиёж 110 минг баррель бўлгани ҳолда, зарур ёнилғининг атиги 40 фоизи – кунига тахминан 30 минг баррель нефть ишлаб чиқарилади.