“Кубокни улар Роналдуга бермоқчи”. Футболчилар ҳакам қароридан норози

Саудия Арабистони Про-лигасида катта баҳс келиб чиқди. “Ал-Аҳли” ва “Ал-Файҳа” ўртасидаги ўйин 1:1 ҳисобида якунланганидан кейин ҳакамлик қарорлари қаттиқ танқид остига олинди. Клуб ижтимоий расмий саҳифаларида баҳсли вазиятлар акс этган видеони эълон қилди ва ВАР ҳамда ҳакамлар ўртасидаги мулоқот ёзувларини тақдим этишни талаб қилди.

Футболчиларнинг кескин баёнотлари

“Ал-Аҳли” футболчилари Иван Тони ва Галено ҳам ҳакамликни қаттиқ танқид қилди. Испаниянинг “Mundo Deportivo” нашри футболчиларнинг сўзларини келтирди. 

“Асосий масала – икки пенальти эди, улар жуда аниқ. Яна нима қилишим керак эди? Агар у тўпни икки қўли билан ушласа, шунда ҳам пенальти бермасмиди? Биз бу вазият бўйича ҳакам билан гаплашмоқчи бўлганимизда, у бизга Осиё Чемпионлар лигасига эътибор қаратишни айтди. Қандай қилиб ҳакам бундай дейиши мумкин?” , дейди “Ал-Аҳли” футболчиси Айвен Тони.

Шунингдек, у “Ал-Наср” жамоасини назарда тутиб, “Бундан ким фойда кўришини биламиз” дея фикр билдирди.

Клубнинг яна бир аъзоси Галено ҳам Тонини қўллаб-қувватлаган. 

“Кубокни бериб қўяверишсин. Улар ҳар қандай йўл билан бизни чемпионликдан четлатмоқчи. Кубокни улар бир кишига беришмоқчи – бу клубимизга нисбатан ҳурматсизлик”, деган Галено. 

Маълумот ўрнида, айни вақтда “Ал-Аҳли” Саудия Про-лигасида 66 очко билан 3-ўринда бормоқда ва етакчи “Ан-Наср”дан 4 очкога орқада. “Ан-Наср” эса бир ўйин кам ўтказган ҳолда пешқадам.

Рамазон Усанов