“Лаънати аҳмоқ”. Трамп Нетаньяхуни ҳақоратлаганини тан олди (видео)

АҚШ Президенти Дональд Трамп Эрон Олий раҳбари Мужтабо Хоманаий билан эҳтимолий учрашув ҳақида маълум қилди ва Исроил Бош вазири Биньямин Нетаньяху билан бўлиб ўтган кескин суҳбатни тасдиқлади. Бу ҳақда у “Pod Force One” подкастига берган интервьюсида сўз очди.

Америка раҳбари Эрон Олий раҳбари Мужтабо Хоманаий билан шахсан учрашиш истаги борлигини билдирган.

“Мен у билан учрашишни истардим. Мен ҳамма билан учрашишни хоҳлайман. Воқеалар ривожига қараб, эҳтимол, қачондир биз учрашамиз”, дейди Трамп.

АҚШ Президентининг сўзларига кўра, 56 ёшли Мужтабо Хоманаий Эрондаги муҳим қарорларни қабул қилишда иштирок этади ва мамлакатда катта ҳурматга эга. 

“У албатта жараёнга жалб қилинган. Менимча, уни жуда ҳурмат қилишади. Назаримда, биз анча яхши тил топишяпмиз”, дейди Оқ уй раҳбари.

Трамп, шунингдек, яқинда бўлиб ўтган телефон мулоқоти чоғида Исроил Бош вазири Биньямин Нетаньяхуни “лаънати аҳмоқ” деб атаганини тасдиқлаган.

АҚШ Президентининг тушунтиришича, унинг ғазабига Исроил ва Ливан ўртасида давом этаётган тўқнашувлар сабаб бўлган. Унинг фикрича, бу тўқнашувлар Вашингтон ва Теҳрон ўртасидаги музокараларни қийинлаштириши мумкин. Кескин ибораларга қарамай, Трамп Исроил Бош вазири билан яхши муносабатларни сақлаб қолганини урғулаган.

“Биз биргаликда жуда яхши ишладик. Менга Биби ёқади ва у билан тил топиша оламан. Мен уруш даври Президентиман. У эса уруш даври Бош вазири”, дейди Америка раҳбари.

Трамп, шунингдек, Эрон билан музокаралар тез ривожланаётганига ва якунда Теҳроннинг ядровий қуролга эга бўлишига йўл қўймаслик имконини беришига ишонч билдирган.

“New York Post” нашрининг қайд этишича, АҚШ Президентининг амалдаги позицияси унинг аввалги баёнотларидан сезиларли даражада фарқ қилади. Илгари Трамп Мужтабо Хоманаийни “заиф шахс” ва Эрон раҳбарлиги ролига номуносиб номзод деб атаган эди.

Эслатиб ўтамиз, аввалроқ “Axios” нашри манбаларга таяниб, Дональд Трамп Биньямин Нетаньяху билан телефон орқали мулоқот чоғида уни кескин танқид қилиб, ҳақоратлагани ҳақида хабар берган эди.