Лавров нега кўринмай қолди? Путин жавоб берди

Россия Ташқи ишлар вазири Сергей Лавров АҚШ Давлат котиби Марко Рубио билан суҳбатлашгани учун “қора рўйхатга тушди”, деган гаплар аҳмоқлик саналади. Бу ҳақда кеча, 27 ноябрь куни Россия Президенти Владимир Путин Қирғизистонга ташрифи якунлари ва Коллектив хавфсизлик шартномаси ташкилоти саммити бўйича матбуот анжуманида сўз очди.

Путин журналист Александр Юнашевнинг саволига жавоб берар экан, Лавров икки ҳафта сиёсий майдондан йўқолиб қолганини Рубио билан суҳбатга боғлаш чалғитувчи гап эканини таъкидлаган. Президент журналистга ҳазил билан Лавровни соғиндингми, деди, аммо у вазир сиёсатдан четда эмаслигини қайд этган.

“Унинг ўз иш жадвали бор. Менга ҳисобот берди, нима билан шуғулланаётганини, қайси вақтда шуғулланишини айтди. Америкалик ҳамкорлар билан учрашувга тайёргарлик кўрмоқда”, деган Путин. 

22 октябрь куни NBC канали манбаларга таяниб, Лавров ва Рубио телефон орқали мулоқот қилгани, бу эса АҚШ Президенти Дональд Трампнинг тинчлик саъй-ҳаракатларига тўсқинлик қилганини хабар қилган. Журналистлар Лавров суҳбат давомида “ташвишли” кўринишда бўлганини иддао қилган.