“Лос-Анджелес Лейкерс” клуби рекорд нархга сотилади

АҚШ миллий баскетбол ассоциацияси (NBA) Бошқарувчилар кенгаши “Лос-Анджелес Лейкерс” клубининг катта улушини Марк Уолтерга сотиш битимини бир овоздан тасдиқлади. Лигага кўра, 10 миллиард долларлик баҳога тузилган ушбу битим яқин кунларда якунланади ва профессионал спорт тарихидаги энг йирик савдо сифатида қайд этилади. Бу ҳақда “Reuters” нашри хабар берди.

“Марк Уолтер бизнинг лигамиз билан узоқ йиллардан бери ҳамкорлик қилиб келмоқда. Мен унинг тажрибаси ва бизнесдаги ютуқларини ҳисобга олган ҳолда, жамоа учун фидойи раҳбар ва лигамиз учун ажойиб қўшимча бўлишига ишонаман”, дейди NBA комиссари Адам Сильвер.

Битимга кўра, 1979 йилдан буён клубнинг асосий эгаси бўлган Бусс оиласи “Лейкерс”даги 15 фоиз улушини сақлаб қолади. Клуб президенти Жеани Бусс эса камида кейинги беш йил давомида жамоанинг губернатори сифатида фаолиятини давом эттиради.

Жерри Бусс 1979 йилда “Лейкерс”ни, “Inglewood Forum” аренасини ва NHL’нинг “Лос-Анджелес Кингс” клубини ўз ичига олган келишув орқали 67,5 миллион долларга сотиб олган.

“Лос-Анжелес Лейкерс” бу мукаммаллик ва буюкликка интилиш рамзи бўлган энг машҳур спорт франшизалардан биридир. Жеани Бусс билан биргаликда ушбу меросни давом эттириш ва жамоани янги даврда ҳам майдонда, ҳам ундан ташқарида муваффақият сари етаклаш мен учун шарафдир”, дейди Марк Уолтер.

Маълумот учун, 1947 йилда ташкил этилган “Лос-Анжелес Лейкерс” NBA тарихидаги энг муваффақиятли клублардан бири бўлиб, 32 марта финалда иштирок этган ва 17 марта чемпионликни қўлга киритган. Бу натижа бўйича жамоа фақат “Бостон Селтикс”дан кейин иккинчи ўринда туради.