20 ёшли баскетболчи ўйиндан кейин вафот этди

АҚШнинг Оклахома штатидаги Коннорс Стейт коллежининг иккинчи курс талабаси Итан Дитц Техаснинг Денисон шаҳрида Грейсон коллежига қарши бўлиб ўтган баскетбол ўйинида бошидан жароҳат олгач, уч кун ўтиб вафот этди. Бу ҳақда “Associated Press” хабар берди.

Бўйи 2,03 м бўлган ҳужумчи ва жамоа сардори Дитц иккинчи чоракда сават яқинида ўйнаган пайтда бошига зарба олиб, ўйинни тарк этган. Коннорс Стейт коллежи матбуот котиби Шеннон Ригсбининг маълум қилишича, дастлабки тиббий кўрик Дитцнинг ушбу ўйинда бошидан жароҳати олганини тасдиқлаган. Шу билан бирга, маъмурият унинг ўлимига айнан ушбу жароҳат сабаб бўлганини расмий тасдиқлай олмаган.

“Итан Дитц мураббий ҳар доим умид қиладиган ўйинчи эди. У спорт ва академик жиҳатдан иқтидорли эди ва меҳнатсеварлик муҳимлигини тушунарди. Агар сиз унинг табассум қилаётганини кўрсангиз, унинг чин дилдан эканини билардингиз. У характерли инсон ва ажойиб жамоадош эди”, дейди “Коннорс Стейт” бош мураббийи Билл Мусе.

Коннорс Стейт эълонига кўра, 1 декабргача иккита аёллар ва иккита эркаклар баскетбол ўйини бекор қилинган.

Маълумот учун, Итан Дитц 2025 йилда ҳар бир ўйинда ўртача 11 очко ва 9,4 тўпни қайтариб олиш кўрсаткичи билан ўйнаган.

Эслатиб ўтамиз, аввалроқ Чикагода 31 ёшли MMA жангчиси Исаак Жонсон Matador Fighter Challenge мусобақасида иштирок этаётганида жанг охирида ерга йиқилиб тушган ва бир неча соат ўтиб вафот этганди.