Лос-Анжелесда комендантлик соати бекор қилинди

АҚШнинг Лос-Анжелес шаҳри мэри Карен Басс иммиграция сиёсатига қарши бошланган оммавий норозилик намойишлари даврида жорий этилган комендантлик соатини бекор қилди. Бу ҳақда “New York Post” нашри хабар берди.

Басснинг айтишича, комендантлик соати жиноятчиликнинг олдини олиш ва уни тўхтатишда, шунингдек, “дўконлар, ресторанлар, тадбиркорлик субъектлари ва аҳолининг вандализм билан шуғулланувчи шахслардан ҳимоя қилинишини таъминлашда” муҳим роль ўйнаган.

У, шунингдек, норозилик намойишлари вақтида ҳибсга олинганлар сони камайганини ва зўравонлик ҳолатлари пасайганини маълум қилган.

Эслатиб ўтамиз, Лос-Анжелесдаги норозилик намойишлари жорий йилнинг 6 июнь куни бошланганди. Улар федерал агентлар томонидан иммиграция қонунчилигига риоя этилишини таъминлаш мақсадида ўтказилган рейдлар ортидан бошланган.

Шаҳар аҳолиси кўчаларнинг бир қисмини тўсиб қўйган, полиция билан тўқнашувлар юзага келган. Полиция кўздан ёш чиқазувчи газ ва шовқинли-свет эффектли гранаталардан фойдаланган, намойишчилар эса бунга отилган мушаклар билан жавоб қайтарган.

Кейинчалик мамлакат Президенти Доналд Трамп Лос-Анжелесга Миллий гвардия қўшинларини киритишни буюрган. Бунга жавобан Калифорния штатининг бош прокурори Трамп маъмуриятига қарши судга мурожаат қилган, губернатор эса Трамп айнан ҳарбий куч киритиш орқали “зўравонликни қўзғатди ва тинч норозиликларни тартибсизликка айлантирди”, деб баёнот берган.

Тез орада штат ҳокимияти шаҳарда талончилик, дўконларни бузиш ва вандализм ҳолатлари бошлангани ҳақида маълум қилган. Полиция томонидан 200 киши қўлга олингани билдирилди, мэр эса 20 дан ортиқ дўкон вайрон қилинганини айтган. Шу асосда шаҳарда комендантлик соати жорий этилгани эълон қилинган эди.