Мадагаскарда ҳарбий тўнтариш: исён етакчиси президент бўлмоқчи

Мадагаскарда ҳокимият ҳарбий тўнтариш ортидан алмашди. Амалдаги Президент оролдан қочиб кетди, мамлакатнинг янги раҳбари эса полковник Майкл Рандрианирина бўлиши кутилмоқда. Бу ҳақда “Deutsche Welle” хабар берди.

Нашрга кўра, ҳарбийлар мамлакатдаги давлат ҳокимияти ҳарбий кенгаш назоратига ўтганини эълон қилган. Кенгаш таркибига армия, жандармерия ва миллий полиция вакиллари кирган.

“Биз ҳокимиятни ўз қўлимизга олдик”, дея миллий радиода баёнот берган полковник Майкл Рандрианирина.

Шунингдек, Конституция амал қилишдан тўхтатилган, Мадагаскар парламентининг қуйи палатаси (Миллий Ассамблея)дан ташқари барча давлат институтлари тарқатиб юборилган. Ҳарбийлар ҳокимиятни ўз қўлига олганини эълон қилишдан бир неча дақиқа олдин депутатлар Президент Андри Радзуэлинани лавозимидан четлатиш учун овоз берган. 

“Euronews” хабарига кўра, Мадагаскар Президенти Андри Радзуэлина Facebook орқали жонли эфирга чиқиб, ҳаётига таҳдидлар туфайли мамлакатни тарк этганини айтган. Унинг сўзларига кўра, бир неча ҳафтадан бери давом этаётган ҳукуматга қарши норозилик намойишлари ҳарбий исёнга сабаб бўлган.

“Мен ўз ҳаётимни ҳимоя қилиш учун хавфсиз жой топишга мажбур бўлдим”, деган у.

Радзуэлина қачон мамлакатни тарк этганини ва ҳозир қаерда эканини ошкор этмаган, бироқ айрим хабарларда у Франция ҳарбий самолётида олиб чиқиб кетилгани айтилган. Франция Ташқи ишлар вазирлиги эса бу маълумотни изоҳлашдан бош тортган.

Мадагаскар Олий конституциявий суди ҳам Радзуэлинанинг истеъфосини тасдиқлаган. Энди кутилишича, эртага, 17 октябрь куни ҳарбийлар етакчиси полковник Майкл Рандрианирина Мадагаскар Республикасининг ўтиш даври президенти сифатида қасамёд қилади.

Қайд этиш жоиз, Мадагаскарда жорий йилнинг сентябрь ойи охирида бошланган ҳукуматга қарши норозилик намойишлари “Z авлод” (Gen Z Mada) ёшлар ташкилоти етакчилигида ўтган ва 11 октябрь куни чўққисига чиққанди. Ўшанда Қуруқликдаги қўшинлар шахсий таркибини бошқариш корпуси (CAPSAT) ҳарбий элита бўлинмаси намойишларга қўшилиб, Радзуэлина ва унинг ҳукуматини истеъфога чақирган.

Орадан кўп ўтмай, CAPSAT қўмондонлиги мамлакатда ҳокимиятни эгаллаганини ва давлат институтларини тарқатганини эълон қилди. Президент маъмурияти эса ўшанда ҳам Радзуэлина ҳокимиятда қолаётганини даъво қилган.

Қизиғи шундаки, ҳокимиятни эгаллаган айнан шу CAPSAT бундан 16 йил олдин – 2009 йилда Андри Радзуэлинага Мадагаскар раҳбари бўлишга ёрдам берган.

Эслатиб ўтамиз, аввалроқ Андри Радзуэлинанинг мамлакатдан қочиб кетиши ортидан ҳарбийлар ҳокимиятни эгаллагани ҳақида хабар берилган эди.