Мадридда минглаб одамлар уй-жой нархларига қарши намойишга чиқди

Испания пойтахти Мадридда минглаб фуқаролар уй-жой нархларининг кескин ошишига қарши норозилик намойиши ўтказди. Улар “муносиб уй-жой ҳуқуқи”ни талаб қилиб, ижара нархларининг ошиб бораётганидан норози эканликларини билдирди. Бу ҳақда “El Pais” хабар берди.

Намойиш Ижарачилар уюшмаси томонидан ташкил этилган ва “Уй-жой ҳаётимизни қимматга туширмоқда. Нарxларни туширамиз” шиори остида ўтказилган. Иштирокчилар ҳукуматдан уй-жой бозорини тартибга солиш ва ижара нархларини пасайтириш бўйича кескин чоралар кўришни талаб қилмоқда.

Расмий маълумотларга кўра, намойишда тахминан 23 минг киши қатнашган бўлса, ташкилотчилар бу рақам 80–100 минггача етганини таъкидлашмоқда.
Намойиш Аточа темир йўл вокзалидан бошланиб, Мадрид марказий кўчалари бўйлаб давом этди. Иштирокчилар уй-жойни спекуляция воситасига айлантиришга қарши чиқишди.

Ташкилотчилар маълумотига кўра, сўнгги 5 йил ичида Мадридда ижара нарxlари 50 фоиздан ортиқ ошган. Натижада кўплаб оилалар даромадининг катта қисмини ижара тўловларига сарфлашга мажбур бўлмоқда. Ижарачилар уюшмаси вакиллари бу ҳолатни “уй-жой инқирози” деб атаб, мавжуд тизимни адолатсиз деб баҳолади ва ҳатто умумий иш ташлаш эҳтимолини ҳам тилга олди.

Намойишда Испаниянинг йирик касаба уюшмалари ҳам иштирок этиб, арзон уй-жой қурилишини кўпайтириш ва ижтимоий уй-жой дастурларини кенгайтириш зарурлигини таъкидлади.