Мадуро Трампдан истеъфога чиқиши эвазига пул ва бошпана сўради

north_east

Мадуро Қатарга кўчиб ўтиши мумкин

Венесуэла Президенти Николас Мадуро жорий йилнинг 21 ноябрь куни АҚШ Президенти Дональд Трампдан 200 миллион доллар шахсий активларини сақлаб қолиш, иттифоқчилари учун амнистия беришни ва дўст мамлакатдан бошпана сўрагани маълум бўлди. Бу ҳақда “The Telegraph” нашрига суҳбатдан хабардор манбалар хабар берди.

Уларга кўра, етакчилар Венесуэланинг юзлаб амалдорларини амнистия қилиш талаби юзасидан муросага кела олмаган. Трамп ва Мадуро ўтиш даври ҳукуматини тузиш ва Венесуэла раҳбарининг эҳтимолий бошпана масаласида ҳам келиша олмаган. Газета манбаларидан бирининг таъкидлашича, Трамп Хитой ёки Россияни бошпана сифатида таклиф қилган, Мадуро эса Ғарбий яримшарда, Куба каби дўст мамлакатда қолиш ниятида эди. Қатар мумкин бўлган муроса сифатида кўриб чиқилди.

Ноябрь ойининг охирида “The New York Times” манбаларига таяниб, Мадуро АҚШга икки-уч йиллик ўтиш даврида истеъфога чиқишни таклиф қилгани, бу ғоя у норасмий музокаралар чоғида илгари сурилгани ҳақида хабар берган эди. Бироқ Оқ уй унинг таклифини рад этиб, зудлик билан истеъфога чиқишини талаб қилди.

Кейинчалик CNN манбаси Мадуро истеъфога чиқишга тайёрлигини, аммо камида 18 ойга эмаслигини билиб олди. Ноябрь ойида “Reuters” АҚШ расмийларига таяниб, Вашингтон Венесуэла раҳбарини ағдариш вариантларини кўриб чиқаётгани ҳақида хабар берган эди. “Politico” нашрининг хабар беришича, АҚШ Мадуро ва унинг расмийларини ҳокимиятдан четлатиш учун Туркия, Россия, Озарбайжон ва Кубани мумкин бўлган давлатлар сифатида кўриб чиқмоқда.

“Miami Herald” нашрининг ёзишича, Трампнинг Мадуро билан суҳбати чоғида АҚШнинг Венесуэла Президентига йўллаган хабари жуда оддий бўлган: у, унинг рафиқаси ва ўғли мамлакатни хавфсиз тарк этиши мумкин эди, лекин у зудлик билан истеъфога чиқишга рози бўлсагина. Газетанинг хабар беришича, Мадуро Венесуэлада эркин сайловлар ўтказиш эвазига умумий амнистия ва Қуролли кучлар устидан назоратни давом эттиришни сўраган.

Вашингтон ва Каракас ўртасидаги муносабатлар жорий йилнинг сентябрь ойи бошида, АҚШ Кариб ҳавзасидаги ҳарбий иштирокини ошира бошлаганида ёмонлашган. Ноябрь ойининг ўрталарига келиб минтақадаги Америка қўшинлари сони 15 мингга етди. Кейин АҚШ Венесуэладаги наркотик картелларидан бири – Қуёш картелини террорчи ташкилот деб белгилади. Кейин Трамп бу ҳаракат АҚШга Венесуэладаги нишонларга зарба беришга имкон беришини таъкидлаб, “Аммо биз буни қиламиз деб айтмаган эдик” деди.

Бундан ташқари, АҚШ Адлия вазирлиги Мадуро ва унинг шерикларини гиёҳванд моддалар савдосига ёрдам беришда айблади ва Венесуэла Президентини ҳибсга олишга ёрдам берадиган маълумот учун мукофот эълон қилди. 2025 йилнинг август ойида мукофот 15 миллион доллардан 50 миллион долларга оширилди.

Эслатиб ўтамиз, аввалроқ Венесуэла Президенти Николас Мадуро АҚШ ва Венесуэла ўртасидаги илгариги норасмий музокаралар чоғида америкалик вакилларга 18 ойдан кейин истеъфога чиқиши мумкинлигини айтганди.