Макгрегор Оқ уйда ким билан жанг қилмоқчи?

UFC'нинг икки вазн тоифасидаги собиқ чемпиони Конор Макгрегор яна аралаш жанг санъатига қайтиш ниятида. Бу ҳақда у инсайдер Ариэль Хелвани билан суҳбат давомида гапирди.

“Мен Оқ уйда бўлиб ўтадиган турнирда иштирок этаман. Бу жараён менга ёқади. Асосий мақсадим – яна октагонга қайтиш. Майкл Чендлер билан жанг қилишни истардим. Яқин орада яхши хабарни эълон қиламиз”, деди Макгрегор Ариэль Хелвани орқали тарқатилган видеолавҳада.

Конор Макгрегор сўнгги бор 2021 йилнинг июль ойида Дастин Порьега қарши жанг қилган ва оёғидан оғир жароҳат олгач, фаолиятини вақтинча тўхтатган эди.

Маълумот учун, АҚШ Президенти Дональд Трамп аввалроқ UFC турнирини 2026 йил 14 июнь куни Оқ уйда ўтказиш режалаштирилаётганини маълум қилган эди. Агар ушбу лойиҳа амалга ошса, бу UFC тарихида илк бор давлат резиденциясида ташкил этилган жанглар кечаси бўлади.

Эслатиб ўтамиз, аввалроқ 37 ёшли ирландиялик жангчи антидопинг қоидаларини бузгани учун 18 ойга дисквалификация қилингани ҳақида хабар берилган эди.

Жаҳонгир Иномжонов