Макрон Трампга рад жавоби беради – ОАВ

Франция Президенти Эммануэль Макрон АҚШ Президенти Дональд Трамп томонидан тузилаётган "Тинчлик кенгаши"га қўшилиш таклифини қабул қилмоқчи эмас. Бу ҳақда “Bloomberg” хабар берди.

Манбага кўра, Макрон янги халқаро ташкилот низоми дастлаб кўзда тутилганидек фақат Ғазо сектори масалалари билан чекланиб қолмаётганини таъкидлаган. Франция Президенти, шунингдек, Бирлашган Миллатлар Ташкилотининг тамойиллари ва институционал асосларига риоя қилиш зарурлиги юзасидан жиддий хавотир билдирган. Парижнинг фикрича, бу тамойиллар муҳокама қилиниши мумкин бўлмаган масалалар ҳисобланади.

"Тинчлик кенгаши" дастлаб Ғазода ўт очишни тўхтатишдан кейин ҳудудни бошқариш билан шуғулланадиган халқаро орган сифатида режалаштирилган эди. Бироқ “Bloomberg” танишиб чиққан низом матнига кўра, ташкилот можаролардан азият чеккан ҳудудларда барқарор тинчликни таъминлашни мақсад қилмоқда. Ташкилотнинг биринчи раҳбари Трамп бўлиши кўзда тутилган, аъзолардан эса умрбод аъзолик учун бир миллиард АҚШ доллари миқдорида бадал олиниши режалаштирилган. 

Шу сабабли айрим доираларда Трамп БМТга рақобатчи бўладиган янги тузилма яратмоқчи бўлиши мумкинлиги ҳақидаги хавотирлар ҳам пайдо бўлган. Маълумки, АҚШ Президенти Бирлашган Миллатлар Ташкилотини бир неча бор танқид қилган.

Ҳозирча "Тинчлик кенгаши"га кимлар таклиф қилингани бўйича тўлиқ рўйхат эълон қилинмаган. Бироқ, айрим давлатлар таклиф олгани аллақачон тасдиқланган.

Эслатиб ўтамиз, аввалроқ Ўзбекистон Республикаси Президенти Шавкат Мирзиёев номига Дональд Трампдан Яқин Шарқда тинчликни мустаҳкамлаш ва можароларни ҳал этиш юзасидан халқаро ташаббусга қўшилиш бўйича расмий таклиф келиб тушгани ҳамда Ўзбекистон раҳбари америкалик мавқедоши жавоб мактубини йўллаб, унда Ўзбекистон Тинчлик кенгашига таъсисчи давлат сифатида қўшилишга тайёрлигини билдиргани ҳақида хабар берилганди.