Макрон Европада фавқулодда ҳолат эълон қилди

Жорий йилнинг 12 февраль куни бўлиб ўтадиган Европа Иттифоқи йиғилишидан олдин Франция Президенти Эммануэль Макрон кеча, 9 февраль куни журналистлар билан учрашув ўтказди. У “The Economist” нашрига берган интервьюсида Европа геосиёсий ва геоиқтисодий фавқулодда вазиятда эканини билдирди.

У Европа Иттифоқи етакчиларини Америка технологияси ва Хитой импорти қаршисида орқада қолмаслик учун тезкор иқтисодий ҳаракатга чақирган.

Kўплаб Европа етакчилари муаммони тан олса-да, Макроннинг таклифларига тўлиқ қўшилиши эҳтимолдан йироқ. Шунга қарамай, Германия, Италия, Бельгия ва бошқа давлатлар раҳбарлари асосий саммитдан аввал алоҳида учрашув ўтказишга келишиб олган. Макрон ҳам бу учрашувга қўшилишини билдирган.

Макроннинг Европа тараққиётини тезлаштириш ва ташқи боғлиқликни камайтириш учун тўрт асосий таклифи бор: қоидаларни соддалаштириш, етказиб берувчиларни диверсификация қилиш, “Европа устуворлиги” сиёсатини жорий этиш ва инновацияга катта сармоя йўналтириш. Жумладан, у давлат ва хусусий секторни қамраб олган келажак учун эвробондларни ишга туширишни, мудофаа, яшил технология ва сунъий интеллект соҳаларига сармоя киритишни таклиф қилмоқда.

Макрон Европанинг стратегик мустақиллиги учун кучли хусусий қоидаларни жорий этиш тарафдори, аммо Германия ва Италия бу ҳаракатни ҳимоячилик сифатида қабул қилиши мумкин. Шу билан бирга, Франция Президенти Европанинг кучини қадрлашини ва 450 миллионлик бозорини геосиёсий куч сифатида ишлатиш имкониятини эътироф этади.

Унинг огоҳлантиришича, вақт ўтяпти ва Европа бу масалаларни ҳал қилмаса, бошқа давлатлар анча олдинга ўтиб олади.

Эслатиб ўтамиз, аввалроқ НАТО Бош котиби Марк Рютте Европа АҚШ ёрдамисиз ўзини ҳимоя қила олмаслигини айтгани ва Америка ядровий соябонини “НАТО эркинлигининг асосий кафолати” деб таърифлагани ҳақида хабар берилган эди.

Фарангиз Суннатова