Мексикада Z-авлод намойиш бошлади

Мексикада авж олган гиёҳванд моддалар савдоси ва зўравонликлар сабаб Z авлод намойиш бошлади. Бу ҳақда “The Guardian” хабар берди.

Маълумотларга кўра, намойишларга ҳар йили ўн минглаб мексикаликларнинг ҳаётига зомин бўлган коррупция ва гиёҳванд моддалар савдоси сабаб бўлган. Минглаб ёшлар кўчаларда намойиш ўтказиши оқибатида камида 120 киши яраланган. 

Намойишчилар маҳаллий полицияни тошбўрон қилгандан сўнг, зобитлар ҳам одамларга таёқлар  билан ҳужум қилган. 

“Аввалига намойишлар тинч йўл билан бошланган эди. Бироқ бир гуруҳ ниқобли одамлар зўравонлик қила бошлади”, дейди Мексика шаҳрининг хавфсизлик бошлиғи Пабло Васкес.

Васкеснинг хабар беришича, намойишлар чоғида 100 нафар полициячи яраланган, улардан 40 нафари жароҳатлар олган ва шифохонада даволанишга муҳтож, 20 нафар намойишчи жароҳатланган.

Намойишчиларнинг аксарияти 1 ноябрь куни ўз шаҳрида гиёҳванд моддалар савдоси билан шуғулланувчи тўдаларга қарши салиб юришига раҳбарлик қилгани учун ўлдирилган Уруапан мэри Карлос Алберто Манзо Родригесга бағишланган плакатлар кўтариб, шляпалар кийиб олишди.

“У ўлдирилди, чунки у жиноятчиларга қарши курашиш учун тоғларга зобитларни юбораётган одам эди. У уларга қарши туришга журъат этди”, деди Мичоаcан штатидан келган 65 ёшли кўчмас мулк агенти Роса Мария Авила. 

Намойишчилар Мексика Президенти  Клаудия Шейнбаум яшайдиган ва ишлайдиган Миллий сарой олдида тўпланиб, бино атрофидаги тўсиқларнинг бир қисмини қулатган. Ҳудуд қўриқчилари тўсиқларни ураётган одамларни ушлаб туриш учун кўздан ёш оқизувчи газ сепган. 

Расмийларга кўра, Мексиканинг иккинчи йирик шаҳри Гвадалахарада ҳам тартибсизликлар содир бўлган, у ерда 47 киши ҳибсга олинган ва 13 киши, жумладан, уч полициячи яраланган.

Эслатиб ўтамиз, аввалроқ Филиппин пойтахти Манилада тахминан 550 минг киши тошқинлардан ҳимоя лойиҳалари атрофидаги фирибгарликларга қарши норозилик билдирган эди.

Бунёд Келдибоев