Мен Испания терма жамоасида ўйнашим мумкин эди – Месси

“Интер Майами” ва Аргентина терма жамоаси сардори Лионель Месси бир вақтлар миллий миқёсда Испания терма жамоаси сафида тўп суриш имконияти бўлганини маълум қилди. Бу ҳақда у “Miro De Atras” дастуридаги суҳбат чоғида маълум қилди. 

“Бир пайтлар шундай имконият пайдо бўлган эди. Мен аллақачон “Барселона”да ўйнардим ва улар менга Испания терма жамоасида ўйнашни таклиф қилди. Бу одатий ҳол эканини, кўпчилик футболчилар билан шундай вазият юз беришини айтишди. Мен аргентиналикман, аммо “Барселона”га жуда эрта кўчиб ўтганман ва машғулотларимнинг асосий қисмини уларнинг академиясида ўтказганман, шунинг учун бу имконият ҳақиқатан ҳам мавжуд эди. Лекин йўқ – юрагим доим Аргентина билан бўлган”, дейди Месси.

Маълумот учун, Лионель Месси Аргентина терма жамоаси сафидаги дебютини 2005 йил 17 август куни Венгрия терма жамоасига қарши учрашувда ўтказган. У 64-дақиқада майдонга тушган, бироқ орадан бир дақиқа ўтиб рақиб футболчисига нисбатан қўполлик ишлатгани сабаб қизил карточка олиб, майдондан четлатилган.

Муваффақиятсиз стартига қарамай, Месси терма жамоа сафида 196 та учрашувда майдонга тушиб, 115 та гол урди. Унинг ютуқлари қаторида икки марта Америка Кубогида ғалаба ва 2022 йилги Жаҳон чемпионати чемпионлиги бор. Шунингдек, Месси футбол тарихида энг кўп соврин ютган футболчи ҳисобланади. Бу борада иккинчи ўринни профессионал фаолиятини якунлаган бразилиялик ҳимоячи Дани Алвес (43 та соврин) эгаллаб турибди.

Аргентина терма жамоаси 2026 йилги Жаҳон чемпионатида Жазоир, Австрия ва Иордания билан бирга “Ж” гуруҳидан ўрин олган.