“Менга қизиқ эмас”. Синдоров Бибисора билан муносабатларига тўхталди

Кеча, 12 апрель куни Кипрда бўлиб ўтаётган шахмат бўйича Номзодлар турнирининг 12-тури бўлиб ўтди. Унда иштирок этаётган ўзбекистонлик гроссмейстер Жавоҳир Синдоров АҚШлик Ҳикару Накамура билан дуранг ўйнади ва мусобақадаги очколари сонини тўққизтага етказиб олди.

Ушбу баҳсдан сўнг Синдоров ва иккинчи ўриндаги Гри Аниш билан орадаги фарқ икки очкони ташкил қилмоқда ва кейинги ўйиндаги дуранг ҳам ўзбекистонликни турнир чемпионига айлантиради. Шунингдек, Аниш 13-турда мағлуб бўлса ёки дуранг ўйнаса ҳам Синдоров кейинги икки турда қандай натижа қайд этишидан қатъи назар Номзодлар турнирининг ғолибига айланади.

Накамурага қарши беллашувдан сўнг Синдоров ўз фикрлари билан ўртоқлашди.

“Кеча жуда муҳим ўйин бўлди ва анча чарчадим. Бугунги дуранг яхши натижа. Ҳозирги вазиятда Ҳикару билан узоқ ва оғир партия ўйнаш учун сабаб кўрмадим. Шунинг учун имкони бор жойларда мажбурий вариантларни танладим. Агар у узун партия ўйнашни хоҳласа, бунга ҳам тайёр эдим. Лекин у ҳам анча ишончли йўлларни танлашини кутгандим. Ҳатто, партиядан олдин тез дуранг бўлишини сезгандим.

Бугун бироз дам оламан. Балки Counter-Strike ҳам ўйнарман. Охирги турларда эса иложи борича ишончли ўйнаш керак. Кимдир мени ютишга ҳаракат қилса ва имконият бўлса, албатта фойдаланаман, лекин ҳозир мажбуран ғалаба излашнинг ҳожати йўқ”, дейди Синдоров.

Шунингдек, у охирги пайтлар ўзи ва қозоғистонлик Бибисора Ассаубаева ҳақида ижтимоий тармоқларда ёзилаётган гапларга эътибор қаратмаётганини ва у учун бу гаплар қизиқ эмаслигини таъкидлади.

Маълумот ўрнида, Синдоров 13-тур доирасида 14 апрель куни иккинчи ўриндаги нидерландиялик Гри Анишга қарши дона суради.

Эслатиб ўтамиз, аввалроқ Жавоҳирнинг блиц йўналишида уч карра жаҳон чемпиони қозоғистонлик Бибисора Ассаубаева билан тушган суратлари кенг муҳокамаларга сабаб бўлганди.

Рамазон Усанов