Мигрантлар яширин туннель орқали Польшага ўтди 

Мигрантлар Беларусь билан чегарадаги ўрмон ичида жойлашган яширин туннель орқали Польшага ўтиб кетди. Ушбу ерости йўли орқали илгари ҳам ўн минглаб мигрантлар ўтган бўлиши мумкин. Бу ҳақда, бугун, 12 декабрь куни Польша чегара хизмати баёнотига таяниб, “Straitstimes” маълум қилди.

Қайд этилишича, кеча, 11 декабрь куни туннель топилганидан сўнг, мигрантларнинг қарийб 130 нафари Польшада қўлга олинган, қолганлари эса ҳануз қидирилмоқда.

Еростида қазилган туннель фақат таёқ устунлар билан мустаҳкамланган бўлиб, унинг баландлиги атиги 1,5 метр. Яширин кириш жойи Беларусь томонда чегара деворидан тахминан 50 метр, чиқиш эса Польша томонида тўсиқдан 10 метр масофада жойлашган.

Шунингдек, чегарачилар томонидан мигрантларни олиб кетиш учун келган 69 ёшли польшалик ва 49 ёшли литвалик шахс ҳибсга олинган.

Баёнотга кўра, ушбу туннель Подляское ғарбий минтақасида фош этилган тўртинчи туннель ҳисобланади. Ҳозирда мутахассислар томонидан қанча мигрантлар ноқонуний чегарани бузиб ўтганлиги аниқлаштирилмоқда.

Эслатиб ўтамиз, аввалроқ Польша Беларусь билан чегарасини бутунлай ёпгани ҳақида хабар берилганди.