Украина муросага тайёр, лекин шармандаликка эмас – Зеленский (видео)

Тинчлик шартномаси 90% якунланди, аммо Украина фақат “кучли” ҳужжатни имзолайди. Украина Президенти Владимир Зеленский бу ҳақда мамлакат халқига йўллаган Янги йил табригида айтиб ўтди. 

Унинг сўзларига кўра, мамлакат “муросага тайёр, лекин шармандаликка эмас”. 

“Менинг имзом кучли шартномада бўлади. Украина тинчликни хоҳлайди, лекин ҳар қандай бадал эвазига эмас. Биз уруш тугашини истаймиз, лекин Украина тугашини эмас”, дейди Украина раҳбари. 

Президентнинг сўзларига кўра, Украинадаги можарога чек қўйиш учун Россияга босим ўтказиш керак. Зеленский шунингдек, Украина Қуролли Кучлари Донецк вилоятидан чиқиб кетгандан кейин ҳарбий ҳаракатлар тўхтайди деган даъволарни “ёлғон” деб атади. 

Давлат раҳбари келажакдаги тинчлик шартномаси Украина халқи томонидан тасдиқланиши кераклигини билдирган. 

“Чунки агар ҳамма нарса адолатсиз бўлса ва тинчлик заиф бўлса ҳамда Москва яна ҳужум қилса, улар: “Мен Украинадаги ҳафсаласи пир бўлган одамларнинг жамоат майдонларида Европа ва Америка раҳбарларининг портретларини ёқишини истамайман”, дейишади”, деди у. 

Зеленский келгуси йилларда тинчликни таъминлайдиган кучли келишув имзолашини қайд этган. 

“Будапешт ҳужжати Украина учун ишламайди. Украинага пухта ишлаб чиқилган Минск тузоғи керак эмас. Заиф келишувларга имзо чекиш фақат урушни кучайтиради”, дейди Украина раҳбари. 

Президент Украина учун хавфсизлик кафолатлари АҚШ Конгресси, Европа мамлакатлари парламентлари ва барча шериклар томонидан ратификация қилиниши кераклигини таъкидлади. 

Зеленский шунингдек, Украина ва Европанинг бирлигига ишора қилган. 

“Ва бу бирлик умид бахш этади. Украина ва Европа ўртасидаги бу бирлик исботланган. Биз 100 миллиард долларлик ёрдам олдик. Бу шунчаки икки йиллик ёрдамдан анча кўпроқ нарса. Бу бизнинг армиямиз учун барқарорлик, халқимиз учун хотиржамлик, пул, маош ва пенсияларни англатади”, деб тушунтирган Зеленский. 

Президентнинг сўзларига кўра, Президент Дональд Трамп ва вице-президент Жеймс Дэвид Вэнс билан учрашув пайтида Оқ уйда бўлиб ўтган жанжалдан кейин АҚШ маъмурияти билан муносабатларни яхшилаш умуман осон бўлмаган. 

“Украина ўзининг овоз бериш ҳуқуқини ҳимоя қилди ва ҳамма Украина ўзини ҳурмат қилишини кўради, шунинг учун. Улар бизни ҳурмат қилишади, Украинани ҳурмат қилишади. Ва бунинг энг яққол исботи бу йил Америка Президенти билан ўтказган етти учрашувимдир. Ва дунёнинг қаерида учрашсак ҳам — Вашингтон, Нью-Йорк, Гаага, Ватикан — АҚШ Президенти доимо халқимизни эслайди, украиналикларнинг қанчалик жасорат билан курашгани ҳақида гапиради”, дея хулоса қилди Владимир Зеленский.

Эслатиб ўтамиз, аввалроқ Украина Президенти Владимир Зеленский Киев ва Вашингтон ўртасида Флоридада бўлиб ўтган музокараларда у таклиф қилган 20 банддан иборат тинчлик режасининг 90 фоизи келишиб олинганини айтганди.