“Нобель”ни бермаганингиз учун! – Трамп Гренландияга нега таҳдид қилаётганини айтди

АҚШ Президенти Дональд Трамп Гренландия ҳақидаги сўзларини унга тинчлик бўйича “Нобель” мукофоти берилмагани билан боғлади. Бу ҳақда “Bloomberg” агентлиги хабар берди. 

“Мамлакатингиз саккизта ва ундан ортиқ урушни тўхтатганим учун менга тинчлик бўйича “Нобель” мукофотини бермасликка қарор қилганини ҳисобга олсак, мен энди фақат тинчлик ҳақида ўйлашга мажбур эмасман”, дея Трампнинг Норвегия Бош вазири Йонас Гар Стёрега йўллаган мактубини келтиради агентлик. 

Трампнинг сўзларига кўра, тинчлик ҳар доим биринчи ўринда бўлса-да, энди у Америка Қўшма Штатлари учун нима яхши ва тўғри бўлиши ҳақида ўйлашим керак.

“Биз Гренландия устидан тўлиқ ва тотал назоратни қўлга киритмагунимизча дунё хавфсиз бўлмайди”, дея қўшимча қилган АҚШ Президенти. 

Эслатиб ўтамиз, 2025 йилги Тинчлик бўйича “Нобель” мукофоти венесуэлалик мухолифатчи Мария Корина Мачадога “Венесуэла халқи учун демократик ҳуқуқларни илгари суриш йўлидаги тинимсиз саъй-ҳаракатлари” учун берилган эди. Аммо у ўз мукофотини АҚШ Президенти Дональд Трампга топширди. 

“Нобель” қўмитаси шу ҳафта бошида медалнинг топширилиши Трамп автоматик равишда Тинчлик мукофоти совриндори бўлишини англатмаслигини айтиб чиқди. “Медаль эгасини ўзгартириши мумкин, аммо тинчлик бўйича Нобель мукофоти лауреатини ўзгартириб бўлмайди”, дейилади қўмита баёнотида. 

“The Guardian” газетаси, ўз навбатида, таҳлилчиларга таяниб, Трампга бундай совға бериш Мачадонинг Венесуэлада ҳокимият тепасига келиш имкониятини сақлаб қолишга уриниши экани ҳақида ёзган.