Новосибирскда миграция назорати кучайтирилмоқда

Жорий йилда Россиянинг Новосибирск вилоятига иш излаб борган меҳнат мигрантлари сони 113 минг нафарни ташкил этди. Бу ҳақда мазкур ҳудуд бўйича Миграция масалалари бошқармаси маълумот берди.

Манбанинг қайд этишича, Новосибирскка борганлар орасида ўзбекистонликлар сони энг юқори. Иккинчи ўринни тожикистонлик фуқаролар эгалласа, учинчи поғонада қирғизистонлик ва қозоғистонликлар турибди. Фақат ишлаш мақсадида ташриф буюрувчи мигрантлар учун патент нархи 2026 йилда 37 фоизга оширилиши белгиланган. Яъни патентнинг янги қиймати 10 минг 860 рублни ташкил этади.

Новосибирск вилояти меҳнат ва ижтимоий ривожланиш вазири Елена Бахаревага кўра, мазкур ўзгариш орқали вилоят бюджети тахминан 2,5 миллиард рублга тўлдирилиши кутилмоқда.

Шунингдек, биринчи вице-губернатор Владимир Знатков патент асосида ишловчи чет элликларни ишга қабул қилишга қўйилган тақиқлар доирасини кенгайтириш тўғрисидаги қарорни имзолаган. Бунгача уларга алкоголь ва тамаки маҳсулотлари чакана савдоси, такси хизматлари ҳамда мактабгача таълим соҳасида фаолият юритишга чекловлар мавжуд эди.

Эндиликда ушбу рўйхатга янги тақиқлар қўшилган: автомобиль орқали юк ташиш, офис, шифохона ва таълим муассасаларидаги ижтимоий ошхоналар ҳамда буфетлар фаолияти, шунингдек, спорт соҳасида ишлаш. Вилоят ҳокимиятига кўра, бу соҳаларда ишга қабул қилишда Россия фуқароларига устуворлик берилади.

Миграция қонунчилигига риоя этилишини текшириш ишлари ҳудудда изчил давом этмоқда. Жорий йилнинг 10 сентябрь куни мигрантларни легаллаштириш учун Президент фармони билан белгиланган муддат якунланган. Шу муносабат билан Россияда рухсатномасиз бўлиб турган чет эл фуқаролари ўз ҳуқуқий мақомини расмийлаштириши ёки мамлакатни тарк этиши лозим.

Расмий маълумотларга кўра, фақатгина Новосибирск вилоятининг ўзида 2 минг 800 дан ортиқ мигрант ўз ҳуқуқий мақомини тартибга келтирган. Бироқ ҳуқуқни муҳофаза қилувчи органлар томонидан ўтказилаётган текширувлар ҳанузгача бир қатор қонунбузарликларни аниқламоқда. Хусусан, етти ой давомида текширилган меҳнат муҳожирлари яшайдиган ва ишлайдиган қарийб 5 мингта объектнинг ҳар бирида ўнлаб, ҳатто юзлаб ноқонуний мигрантлар аниқланган. Бу каби шахслар белгиланган тартибда Россия ҳудудидан чиқариб юборилмоқда.

Эслатиб ўтамиз, аввалроқ Россиядан неча мигрант депортация қилиниши кераклиги айтилганди. Хусусан, Россия Ички ишлар вазирлигининг назорат остидаги шахслар реестрига 770 минг мигрант киритилган бўлиб, уларнинг учдан бир қисми аёллар ва болалардан иборат.

Моҳичеҳра Қадамова