Nvidia компьютерларга СИни бирлаштирувчи чипни тақдим этди

Американинг Nvidia компанияси сунъий интеллект технологияларини ноутбук ва шахсий компьютерларга олиб кириш мақсадида янги авлод чипини тақдим қилди. Бу ҳақда Тайпей шаҳрида ўтган йиллик Nvidia GTC конференциясида компания бош директори Женсен Хуанг эълон қилди.

Женсен Хуанг янги RTX Spark суперчипини конференцияда намойиш этган. Унинг айтишича, мазкур технология шахсий компьютерларни қайта кашф этади. Янги чип марказий процессор (CPU) ва график процессор (GPU) имкониятларини бирлаштириб, сунъий интеллект моделларини тўғридан тўғри қурилманинг ўзида ишлатиш имконини беради. Компания бу қурилмаларни “AI PC” – сунъий интеллектга эга шахсий компьютерлар деб атаган.

Хабарларга кўра, RTX Spark чиплари билан жиҳозланган янги ноутбук ва компьютерлар жорий йилнинг кузида бозорга чиқарилиши кутилмоқда. Улар Dell, HP, Lenovo, ASUS, Microsoft Surface ва MSI каби брендлар маҳсулотларида қўлланилади.

Nvidia’нинг маълум қилишича, янги тизимлар фойдаланувчиларга маҳаллий тарзда ишлайдиган интеллектуал ёрдамчилардан фойдаланиш имконини беради. Бундай ёрдамчилар файлларни таҳлил қилиш, маълумот излаш, тадқиқотларда кўмаклашиш ва фойдаланувчи билан мулоқот қилиш каби вазифаларни бажара олади.

Microsoft ҳам янги компьютерлар юқори қувватли сунъий интеллект моделлари ва мураккаб ҳисоблаш вазифаларини қўллаб-қувватлашини маълум қилган.

Таҳлилчиларнинг фикрича, Nvidia’нинг бу қадами кейинги ўн йилликда шахсий компьютерлар қандай кўринишга эга бўлишини белгилаб бериши мумкин. “Counterpoint Research” таҳлилчиси Нил Шаҳ буни “компьютерлар эволюциясидаги инқилобий ўзгариш” деб баҳолаган. Шу билан бирга, янги технологиялар махфийлик масалалари бўйича баҳсларни ҳам кучайтирмоқда. Айрим экспертлар сунъий интеллект ёрдамчилари фойдаланувчиларнинг шахсий маълумотларига кенг кўламда кириш ҳуқуқига эга бўлиши мумкинлигидан хавотир билдирган.

Маълумотларга кўра, Nvidia акциялари тақдимотдан сўнг биржа савдоларида 6 фоизга қимматлашган. Microsoft акциялари 2,2 фоизга, Dell акциялари эса, 10 фоизга ўсган.

Эслатиб ўтамиз, аввалроқ Google сунъий интеллект билан ишловчи янги ноутбугини тақдим этган эди.