Олимпия чемпиони Лазизбек Мулложоновда допинг аниқланди

Жаҳон бокс федерацияси (World Boxing) учун мустақил антидопинг дастурини юритаётган Халқаро Допингга қарши агентлик (ITA) ўзбек боксчиси Лазизбек Мулложоновда метастерон моддасининг метаболитлари аниқланганини маълум қилди.

ITA хабарига кўра, жорий йилнинг 11 июнь куни мусобақадан ташқари ўтказилган допинг назорати давомида олинган намуна таҳлили Мулложонов организмида метастерон метаболитларини аниқлаган.

Метастерон Бутунжаҳон Антидопинг агентлиги (WADA) томонидан тақиқланган моддалар рўйхатининг С1.1 бўлими (анаболик андрогеник стероидлар) остида туради. У доимий тақиқланган модда ҳисобланади (мусобақа вақтида ҳам, ташқарисида ҳам) ва махсус белгиланган модда эмас. Метастерон – сунъий йўл билан олинган анаболик-андрогеник стероид бўлиб, тез мушак ўсишини, куч ва қувватнинг ошишини рағбатлантиради.

Спортчига бу ҳолат ҳақида хабар берилган ва у Б-намунани таҳлил қилишни сўраш ҳуқуқига эга.

Агар спортчи Б-намунани таҳлил қилишни сўраса ва у А-намунанинг натижасини тасдиқласа, ҳолат антидопинг қоидасининг тасдиқланган бузилиши сифатида қаралади. Агар Б-намуна таҳлили сўралмаса, иш яна тасдиқланган антидопинг қоидабузарлиги сифатида давом эттирилади. Спортчига натижа юзасидан ўз изоҳларини тақдим этиш имконияти берилади.

Шунингдек, Бутунжаҳон Антидопинг кодекси ва World Boxing'нинг 7.4.1-моддасига мувофиқ, спортчига вақтинчалик мажбурий четлатиш чорасини қўллаш белгиланган. Спортчи бу вақтинчалик четлатиш қарорига эътироз билдириши ва уни бекор қилишни сўраши мумкин.

World Boxing антидопинг дастурини ITA'га топширгани сабабли ушбу иш бўйича барча жараёнлар ITA томонидан олиб борилади. Иш давом этаётгани сабабли бошқа изоҳлар берилмайди.

Эслатиб ўтамиз, Лазизбек Мулложонов 2024 йилда Франциянинг Париж шаҳрида ўтказилган ёзги Олимпия ўйинларида олтин медални қўлга киритганди. Финал жангида 92 килограммгача бўлган вазн тоифасида Осиё чемпиони, ҳарбийлар ўртасида жаҳон чемпиони, 2022 йилги жаҳон чемпионати бронза медали совриндори ўзбекистонлик Лазизбек Мулложонов асли кубалик бўлган Озарбайжон вакили Алфредо Домингезга қарши рингга кўтарилиб, уни мағлуб этганди.