Перу пойтахтида фавқулодда ҳолат эълон қилинди 

Перуда намойишлар ортидан ҳокимиятга келган муваққат президент Хосе Хери бугун, 22 октябрь куни пойтахт Лима шаҳрида 30 кун муддатга фавқулодда ҳолат жорий этилганини маълум қилди. Ушбу чора доирасида қуролли кучлар полиция билан ҳамкорликда жамоат тартибини таъминлашга жалб этилади. Бу ҳақда “Associated Press” хабар берди.

Қайд этилишича, режим бугун, 22 октябрдан кучга киради ва 30 кун давом этади. Вазирлар Маҳкамаси Лимада фавқулодда ҳолат жорий этилишини маъқуллаган. Хосе Херининг сўзларига кўра, бу чора мамлакатда тинчлик, осойишталик ва миллионлаб перуликларнинг ишончини тиклашга ёрдам беради.

Қайд этиш жоиз, Перуда норозиликлар 10 октябрь куни собиқ президент Дина Болуартега нисбатан импичмент эълон қилиниб, у давлат раҳбари лавозимидан четлатилгач бошланганди. Ўтган ҳафта охиридаёқ ҳукумат фавқулодда ҳолат эълон қилиш арафасида эканини билдирган ва аниқ чоралар кўриш ишларини бошлаган.

Маълумот учун, сўнгги йилларда Перуда жиноятчилик даражаси кескин ошгани айтилмоқда, қотилликлар, талончилик, товламачилик ва кичик тадбиркорларга жиноятчи гуруҳлар томонидан таҳдидлар кучайган. Шу сабабли, аҳоли бир неча бор иш ташлашлар ва норозилик акцияларини ўтказган.