Перуда депутатлар Президентни истеъфога чиқарди

Кеча, 9 октябрь куни 130 аъзодан иборат Перу парламенти мамлакат Президенти Дина Болуартенинг лавозимидан четлаштириш учун овоз берди. Бу ҳақда “Diario Gestion” хабар берди.

Маълумотларга кўра, депутатлар овоз бериш жараёнини ярим тунда амалга оширган. Қисқа вақт ичида 130 депутатдан 122 нафари Болуартега импичмент эълон қилиш учун овоз берган. Ушбу ҳаракатга нисбатан ҳеч қандай норозилик билдирилмаган. Шундан сўнг, сиёсатчилар Конгресс раҳбари Хосе Ерини Перунинг янги президенти сифатида эълон қилган.

Парламент аъзолари давлат раҳбарини маънавий қобилиятсиз деб эълон қилган. Конгресс аъзолари импичмент тўғрисидаги аризаларида Болуарте ўсиб бораётган сиёсий ва ижтимоий инқироз шароитида мамлакатни бошқаришга нолойиқлигини айтиб, уни коррупция билан шуғулланишда ва ахлоқий меъёрларни бузишда айблаган.

Хосе Ери республиканинг янги президенти сифатида қасамёд қилиш чоғида ўз зиммасига олган вазифасини шаффофлик билан бажаришга ваъда берган.

“Худо номига, мамлакатим номига, барча перуликлар номига қасамёд қиламанки, мен Перу Сиёсий Конституциясига мувофиқ ўз зиммамга олган Республика Президенти лавозимини шу пайтдан бошлаб 2026 йил 26 июлга қадар содиқлик билан бажараман. Миллий суверенитетни, мамлакатимизнинг жисмоний ва маънавий яхлитлигини ҳимоя қиламан”, деган Хосе Ери.

Қайд этиш жоиз, Перуда давлат раҳбари лавозимидан кетиши учун мамлакат Конституциясининг 113-моддаси 2-бандига кўра, Конгресснинг 130 аъзосининг учдан икки қисми овоз бериши керак.

Эслатиб ўтамиз, аввалроқ Эквадор Президенти Даниэль Нобоанинг кортежи намойишчилар томонидан тошбўрон қилинган эди.

Бунёд Келдибоев