Пезешкиён Исроил зарбалари оқибатида яраланди – ОАВ

Эрон Президенти Масъуд Пезешкиён Исроилнинг Теҳронга берган зарбалари давомида енгил жароҳат олди. Бу ҳақда “Fars News” хабар берди.

Қайд этилишича, Пезешкиён 16 июнь куни Исроил томонидан Теҳронга қилинган зарба вақтида оёқ соҳасидан енгил жароҳат олган. Бу воқеа Эрон Олий миллий хавфсизлик кенгашининг йиғилиши чоғида содир бўлган. 

Хабарга кўра, Исроил кучлари бинонинг кириш ва чиқиш йўлакларига олти бомба билан зарба берган. Оқибатда бино ичида электр таъминоти узилган, аммо амалдорлар фавқулодда чиқиш йўлаги орқали ташқарига чиқишга муваффақ бўлган.

Теҳрон ҳозирда зарбанинг жуда аниқ координаталар асосида амалга оширилганини инобатга олиб, “ички жосуслик бўлиши эҳтимоли” юзасидан суриштирув олиб бормоқда.

Нашрнинг ёзишича, бу ҳужум 2024 йилнинг 27 сентябрида Исроил томонидан Ливан пойтахти Байрут яқинида жойлашган “Ҳизбуллоҳ” марказий штабига уюштирилган ҳужум сценарийси асосида ишлаб чиқилган. Ўша ҳужумда ташкилот раҳбари Ҳасан Насруллоҳ ҳалок бўлган эди.

Эслатиб ўтамиз, аввалроқ Эрон Президенти Масъуд Пезешкиён Исроил уни ўлдиришга уринганини маълум қилганди. Президентнинг сўзларига кўра, суиқасдга уриниш пайтида у “қандай қилиб олдинга силжиш мукинлиги” масалалари муҳокама қилинаётган йиғилишда иштирок этаётган бўлган. Шу вақтда Исроил йиғилиш ўтаётган ҳудудга зарба беришга уринган.