Португалия Роналдунинг дисквалификацияси бўйича FIFA’га ариза тайёрламоқда

Португалия футбол федерацияси (FPF) Криштиану Роналдунинг Ирландияга қарши ўйинда (0:2) Дара О’Ши билан тўқнашувдан сўнг тўғридан тўғри қизил карточка олгани сабабли, унинг 2026 йилги Жаҳон чемпионатининг илк ўйинини ўтказиб юбормаслиги учун FIFA’га мурожаат қилиш масаласини кўриб чиқмоқда. Бу “JM-madeira” нашри хабар берди.

Роналду дисквалификация туфайли Арманистон устидан 9:1 ҳисобида қўлга киритилган йирик ғалабада майдонга тушмади. Бироқ унинг тақиқи неча ўйин давом этиши ҳозирча аниқ эмас. Одатда тўғридан тўғри қизил карточка бир неча ўйинга жазога сабаб бўлиши мумкин, бу эса уни ЖЧ-2026 нинг илк ўйинини ҳам ўтказиб юбориш эҳтимолини кучайтиради.

Манбага кўра, FPF президенти Педро Проэнка бошчилигида федерация жазони юмшатиш учун уч асосий далилни ўз ичига олган расмий мурожаат тайёрламоқда.

Мурожаатда таъкидланаётган асосий омиллар:

•      Стадиондаги кескин муҳит ва Ирландия терма жамоаси бош мураббийи Хеймир Хадльгримссоннинг Роналдуни аввалги ўйинда ҳакамга босим ўтказганликда айблаши.
•      Тўқнашув олдидан Дара О’Шининг Роналдунинг формасидан тортгани, яъни провокация мавжуд бўлгани.
•       Роналдунинг намунавий интизоми – терма жамоа сафида 226 та ўйинда у бирор марта ҳам қизил карточка олмаган.

Федерация ушбу далиллар асосида дисквалификацияни қисқартириш ёки бекор қилиш орқали Роналдунинг Жаҳон чемпионатининг очилиш ўйинида иштирок этишига эришмоқчи.

Эслатиб ўтамиз, аввалроқ Роберто Мартинес бошчилигидаги Португалия Арманистонга қарши беллашувда 9:1 ҳисобидаги йирик ғалабани қўлга киритиб, Жаҳон чемпионатига йўлланмани олган эди.