Prada Versace’ни сотиб олди

Prada Group Versace’ни қарийб 1,4 миллиард долларга сотиб олиш бўйича битимни якунлади. Бу ҳақда “Reuters” хабар берди.

Prada модалар уйи Versace’ни унинг бренд эгаси бўлган Capri Holdings Ltd. компаниясидан сотиб олаётгани илк бор жорий йилнинг апрель ойида маълум бўлган эди. Битим қиймати 1,375 миллиард долларни ташкил қилган.
 
Prada эгалари Миучча Прада ва Патрицио Бертеллининг ўғли Лоренсо Бертелли ноябрь ойида “Reuters”га берган интервьюсида битим жараёни тугагач, Versace’га раҳбарлик қилиши ҳақида айтган. Унинг сўзларига кўра, Prada бу битимга бир неча йилдан буён қизиқиб келган.

“COVID давридаёқ алоқа бўлган, музокаралар Capri’нинг Tapestry компаниясига сотилишидан олдин ҳам олиб борилган. Рақобатга қарши қонунчилик бекор бўлгач, биз музокараларга қайтдик ва жараённи тезлаштиришга ҳаракат қилдик”, дейди Бертелли.

Маълумот учун, Prada Италия компанияси бўлиб, 1913 йилда Марио Прада ва унинг укаси Мартино томонидан асос солинган. Улар дастлаб чарм буюмлар – чамадон, сумка ва бошқа маҳсулотларни импорт қилган, кейин эса ўзлари ишлаб чиқаришни йўлга қўйган. Бренд ривожланишида асосий ролни компания асосчисининг набираси Миучча Прада ўйнаган (Miu Miu бренди унинг номи билан аталган). У кўп йиллар давомида Prada’нинг бош дизайнери ва компаниянинг раҳбарларидан бири бўлиб ишлаган.
 
Versace брендига эса 1978 йилда дизайнер Жанни Версаче томонидан асос солинган. Компания кийим-кечак, атир-упа, соат, аксессуар ва бошқа ҳашаматли маҳсулотларни ишлаб чиқаради. Дизайнер 1997 йилда АҚШнинг Маями-Бич шаҳридаги уйининг эшиги олдида серияли қотил Эндрю Кьюненан томонидан ўлдирилган. Унинг ўлимидан сўнг компанияни синглиси Донателла бошқара бошлаган. 2018 йилда у бизнесни Американинг Michael Kors компаниясига (ҳозирги Capri) 2 миллиард долларга сотган, аммо шунга қарамай Versace’нинг бош дизайнери сифатида фаолиятини давом эттирган