Путин совуқ об-ҳаво туфайли Украинага бир ҳафта ҳужум қилмасликка қарор қилди (видео)

АҚШ Президенти Дональд Трамп Россия Президенти Владимир Путиндан кучли совуқ туфайли кейинги етти кун давомида Украинага ҳужум қилмасликни сўради. Путин бу илтимосга ижобий жавоб қайтарди. Бу ҳақда кеча, 29 январь куни АҚШ Президенти Овал офисида бўлиб ўтган тадбирда журналистларга маълум қилди.

Қайд этилишича, Трамп Украина ҳеч қачон бундай совуқни кўрмаганини айтган. Унинг сўзларига кўра, ҳозир мамлакатда энергия тизимларига зарба берилгани учун ҳар доимгидан-да изғиринроқ.

“Улар ҳеч қачон бундай совуқни бошдан кечирмаган. Ва мен шахсан президент Путиндан Киев ва бошқа шаҳарларни бир ҳафта давомида ўққа тутмасликни сўрадим. Ва у бунга рози бўлди”, деди Трамп.

Украина Президенти Владимир Зеленский Вашингтонга ушбу ташаббус учун миннатдорчилик билдирган. У бу ташаббусни Россиянинг энергетика мақсадларига зарбаларини тўхтатиш деб таърифлади. Бу ҳужумлар Киевдаги юзлаб квартираларни совуқ ҳавода электрсиз қолдирганди.

Шу билан бирга, Украина Президенти Владимир Зеленский қишки совуқ учун энергия сулҳи тўғрисидаги келишувни тасдиқлади ва Трампнинг Украина шаҳарларини Россия ҳужумларидан ҳимоя қилиш имконияти ҳақидаги баёнотини олқишлади.

“Президент Трампнинг Киев ва Украинанинг бошқа шаҳарларини бу қишки совуқда Россия ҳужумларидан ҳимоя қилиш имконияти ҳақидаги муҳим баёноти. Биз уларнинг халқимиз ҳаётини ҳимоя қилишга ёрдам беришдаги саъй-ҳаракатларини қадрлаймиз. Раҳмат, Президент Трамп!, деб ёзди Зеленский  ижтимоий тармоқларда.

Трампнинг Кремль ёки Украина расмийлари томонидан зарбаларни тўхтатиш тўғрисидаги келишувга оид баёнотлари расмий тасдиқланмаган, бироқ Путин мавқедошининг илтимосини ижобий қабул қилгани айтилмоқда.

Эслатиб ўтамиз, аввалроқ Россия ва Украина ҳалок бўлганларнинг жасадларини алмашиши ҳақида хабар берилганди. Унга кўра, Россия Украинага минг нафар ҳалок бўлган ҳарбийнинг жасадини топширган, эвазига эса 38 нафар ҳалок бўлган россиялик ҳарбийнинг жасадини қайтариб олган.