Путин ва Трамп музокараси қаерда бўлиши мумкинлиги айтилди

north_east

Трамп ва Путиннинг Украинасиз музокаралари хавфли бўлади – Зеленский

Москва Саудия Арабистони ва Бирлашган Араб Амирликларини Россия Президенти Владимир Путин ва АҚШ Президенти Дональд Трамп ўртасидаги музокаралар учун эҳтимолий жой сифатида кўриб чиқмоқда. Бу ҳақда россиялик икки манбасига таяниб, “Reuters” хабар берди.

Қайд этилишича, сўнгги ҳафталарда Россиянинг юқори мартабали амалдорлари ҳар икки давлатга ҳам ташриф буюрган. Шу билан бирга, нашр суҳбатдошларидан бири бу ғояга маълум даражада қаршилик кўрсатаётганини даъво қилган, чунки бир қатор дипломатлар ва разведка ходимлари Америка Қўшма Штатлари Саудия Арабистони ва БАА билан ҳам яқин ҳарбий ва хавфсизлик алоқалари борлигини таъкидлаган. 

“Reuters” манбалари ушбу босқичда 2022 йил баҳорида Москва ва Киев делегацияларига мезбонлик қилган Туркияни музокаралар учун мумкин бўлган жой сифатида рад этган. Агентликнинг қайд этишича, Анқара НАТО аъзоси ҳисобланади.

Ар-Риёд ва Абу-Даби нашрнинг изоҳ сўровига жавоб бермаган, Кремль эса агентликка изоҳ беришдан бош тортган.

Эслатиб ўтамиз, аввалроқ Швейцария Ташқи ишлар вазирлиги вакили Николас Бидо жорий йилнинг 10 январь куни чоп этилган маҳаллий “Le Temps ” нашрига берган интервьюсида АҚШ Президенти Дональд Трамп ва Россия Президенти Владимир Путин ўртасида кутилаётган учрашув Швейцарияда бўлиб ўтиши мумкинлигини айтганди. Шундан сўнг, Кремль матбуот котиби Дмитрий Песков  икки ўртадаги учрашув қаерда бўлиши ҳақида гапиришга ҳали эрта деганди.