Путин ва Зеленский барибир учрашмайди – Мерц

Россиянинг Украинага қарши бошлаган урушини тугатишга уринишда ушбу давлатлар Президентлари Владимир Зеленский ва Владимир Путиннинг шахсий учрашуви бўлиб ўтмайди. Бу ҳақда Германия канцлери Фридрих Мерц кеча, 28 август куни Франция Президенти Эммануэль Макрон билан учрашувда айтиб ўтди.

“Президент Зеленский ва Президент Путин ўртасидаги учрашув аниқ бўлмаслигига асосланиб, бугун бу масалани яна бир бор кўриб чиқишимиз керак”, деди Мерц дипломатик саъй-ҳаракатларни давом эттириш ҳақида гапирар экан.

Унинг сўзларига кўра, бу “ўтган ҳафта Президент Трамп ва Президент Путин ўртасида келишилганидан” ва Трамп билан Вашингтондаги учрашувда муҳокама қилинган нарсалардан фарқ қилади.

Ўтган ҳафта бошида Путин билан телефон суҳбатидан сўнг Трамп Россия ва Украина Президентлари учрашуви режаси ишлаб чиқилаётганини айтди. Кремль, ўз навбатида, фақат делегациялар даражасини оширишга тайёрлигини эълон қилди.

Мерц аввалроқ Москва бу масалада “кечиктириш стратегияси”га мурожаат қилиб, учрашувни маъқуллашни маълум дастлабки шартлар билан боғлаб қўйганини таъкидлаган эди.

“Путин бу учрашувни Украина нуқтаи назаридан ҳам, бизнинг шахсий нуқтаи назаримиздан ҳам, мутлақо қабул қилиб бўлмайдиган дастлабки шартлар билан боғлашни тўғри деб ҳисоблайди”, дея таъкидлади Германия ҳукумати раҳбари.

Худди шундай фикрни аввалроқ Москванинг музокараларга тайёрлигига шубҳа билан қарайдиган Германия Ташқи ишлар вазири Йоханн Вадефуль ҳам билдирган эди.

“Россия ва Украина ўртасидаги музокаралар яқин келажакда бўлиб ўтишига менда жиддий шубҳа бор”, деди Вадефул Германиянинг “Focus” ҳафталик нашрига берган интервьюсида.

Маълумот учун, 15 август куни Аляскада Россия Президенти Владимир Путин билан учрашув ва 18 августда Европа етакчиларининг Оқ уйга ташрифидан сўнг АҚШ Президенти Дональд Трамп Оқ уй Россия ва Украина Президентларининг шахсий учрашувига тайёргарлик кўра бошлаганини айтди. Бироқ Москва буни тасдиқламади ва музокаралар “даражасини ошириш”га розилик ҳақидаги баёнот билан чекланди.

Кўп ўтмай, Кремль вакиллари ўз баёнотлари билан Москванинг Украинага қўйган ультиматум талаблари ўзгармаганини кўрсатди. Кремль Путин ва Зеленский ўртасидаги учрашувни ўтказишни тўғридан тўғри рад этмади, бироқ у яқин келажакда учрашув ўтказмоқчи эмаслигини аниқ билдирди.

Шу фонда Трамп 22 август куни икки ҳафта ичида Москва ва Киевнинг кейинги ҳаракатларига қараб Украинадаги уруш бўйича “жуда муҳим қарор” қабул қилишини айтди. Бироқ, АҚШ Президенти таъкидлаганидек, у можаро тарафларига нисбатан санкциялар ёки тарифлар қўйиши ёки “ҳеч нарса қилмаслиги” мумкин.

Эслатиб ўтамиз, Украина Президенти Владимир Зеленский ҳам 26 август куни кечки видеомурожаатида Россия томони билан музокаралар Туркияда ўтказилиши мумкинлигини айтганди. Бунгача уларнинг учрашуви Венгрияда ўтказилиши мумкинлиги хабар қилинганди. Бироқ Зеленский буни рад этди. У Австрия, Швейцария ёки Туркияда учрашув ўтказишга рози, аммо Венгрия ёки Россияда эмас.