Путинга ёзилган хатдан керакли натижани олдим – Зеленский

Украина Президенти Владимир Зеленский бир ой давомида турли мақсадларда турли ташкилотлар ва мамлакатларга бир нечта хат ёзганини, хусусан, Россия Федерацияси Президенти Владимир Путинга мактуб йўллаб, ўзига керакли натижага эришганини билдирди. Бу ҳақда у кеча, 9 июнь куни Таллинда Шимолий Европа ва Болтиқбўйи мамлакатлари етакчилари билан биргаликда ўтказилган матбуот анжуманида сўз очди.

“Бир ой давомида мен Европа Иттифоқидан бошлаб, АҚШ Президенти, АҚШ Конгрессига, шунингдек, Путинга бир нечта хат юбордим. Менда турли мақсадлар бор эди. Мисол учун, АҚШга мурожаат қилар эканман, уларнинг эътиборини Яқин Шарқдан Украинадаги вазиятга бироз бўлса-да қаратиш учун ҳамма нарсани қилишни хоҳладим.

Мен сизлар билан барча тафсилотларни баҳам кўролмайман, лекин давлатимга жуда катта миқдорда ракетага қарши мудофаа воситалари зарур. Мен натижага эришдим, бироқ ҳозир бу натижа айнан нимадан иборат бўлганини айтолмайман, лекин мен буни уддаладим.

Путинга хат юборишдан мақсадим бор эди ва ўйлайманки, мен ўзимга керакли натижани олдим”, дейди Зеленский.

У Путинга ёзилган хат контекстида айнан қандай натижа ҳақида гап кетаётганига аниқлик киритмаган.

Эслатиб ўтамиз, жорий йилнинг 4 июнь куни Владимир Зеленский Владимир Путинга очиқ хат эълон қилиб, унда урушни “тўғридан тўғри мулоқот” ва шахсий учрашув орқали якунлашни таклиф қилган эди. Россия Федерацияси Президенти эртаси куниёқ Петербург халқаро иқтисодий форумининг ялпи мажлисидаги чиқиши вақтида жавоб қайтарди. Путин Зеленскийнинг хатида “қўполлик унсурлари” борлигини маълум қилди. У учрашувлардан ҳеч қачон бош тортмаганини ва Украина Президенти Москвага бориши мумкинлигини қўшимча қилди.  

Май ойининг охирида Владимир Зеленский Дональд Трампга ҳам хат йўллаб, унда Украинада ҳаво ҳужумидан мудофаа тизимлари, хусусан, баллистик ракеталарга қарши курашиш воситалари тақчиллиги чуқурлашиб бораётганидан огоҳлантирган.