Роналду яна бир мукофотга сазовор бўлди

Кеча, 7 октябрь куни Криштиану Роналду "Portugal Football Globes" тантанали маросимида Prestij мукофоти билан тақдирланди. Бу мукофот 40 ёшли португалиялик юлдузга ўзининг узоқ йиллик меҳнатини эътироф этиш мақсадида топширилди. Бу ҳақда “A Bola” нашри хабар берди.

Маросимда сўзлаган нутқида Роналду Португалия терма жамоаси сафида ўйнашдан ҳануз завқланишини ва келаси жаҳон чемпионати йўлланмасини қўлга киритишга қатъий бел боғлаганини айтди:

“Биз ҳозирча фақат навбатдаги ўйинларга эътибор қаратишимиз керак. Мақсадимиз  жаҳон чемпионатига чиқиш ва ғалаба қозониш, лекин бунга босқичма-босқич эришамиз. Мураббий Роберто Мартинес айтганидек, бугундан завқ олиш муҳим. Биз уйда, ўз мухлисларимиз қаршисида ўйнаймиз ва бундай пайтларда Португалия янада кучли бўлади”, дейди Роналду.

Роналду, шунингдек, терма жамоа шарафини ҳимоя қилиш ҳали ҳам унинг учун катта фахр эканини таъкидлади.

“Мен учун Португалия терма жамоасида ўйнаш шараф. Мухлислар ҳар доим бизни қўллаб-қувватлайди, натижадан қатъи назар. Ишончим комилки, биз келаси ўйинларда ғалаба қозонамиз ва жаҳон чемпионатига йўлланмани қўлга киритамиз”, деди Роналду.

У ўзига берилган мукофотни фаолиятининг якуни сифатида эмас, балки меҳнат, фидойилик ва садоқатнинг эътирофи сифатида қабул қилганини айтди.

“Бу хайрлашув мукофоти эмас. Мен буни кўп йиллик меҳнат ва амбицияларнинг натижаси деб биламан. Менга ғалаба қозониш ва ёш авлодга ёрдам бериш ёқади. Улар мени илҳомлантиради ва ўзимни юқори даражада ушлаб туришимга сабаб бўлади”, дейди у.

Роналду, шунингдек, вақт ўтиши билан футболга бўлган ёндашуви ўзгарганини ҳам тан олди:

“Агар бу 20 йил олдин бўлганида, мен дунёни забт этаман деган бўлардим. Энди эса мен ҳаётни бошқача кўраман. Ҳамма нарса тез ўтади, шунинг учун ҳар бир дақиқадан завқ олишга ҳаракат қиламан. Оилам ҳам кўп бора “етар, энди тўхта” дейди, лекин мен ҳали ҳам ўзимни фойдали ҳис қиламан  клубим ва терма жамоамга ёрдам бериш мен учун катта фахр”, дейди Роналду.

Маълумот учун, Криштиану Роналду Португалия терма жамоаси билан олдинда турган FIFA кунларида Жаҳон чемпионати саралаш босқичи учрашувларида майдонга тушади. Португалиянинг дастлабки учрашуви жорий йилнинг 11 октябрь санасида Ирландияга қарши бўлиб ўтади. Навбатдаги учрашувда эса Венгрияни қабул қилади. Бу учрашув 14 октябрда бўлиб ўтиши режалаштирилган.