Роналдуга ЖЧ очилиш ўйинида иштирок этишга рухсат берилди

Португалия терма жамоаси сардори Криштиану Роналду FIFA томонидан уч ўйинга берилган дисквалификациянинг сўнгги икки қисми шартли равишда тўхтатилганидан сўнг, келаси йилги Жаҳон чемпионатининг биринчи ўйинларида майдонга тушиши мумкин бўлади. Бу ҳақда FBC news хабар берди.

Роналду ноябрь ойидаги халқаро танаффус пайти Европа саралаши доирасидаги Португалия – Ирландия учрашувида (0:2) ҳимоячи Дара О’Шига тирсаги билан зарба бергани учун майдондан четлатилган эди.

Қизил карточка туфайли у Португалиянинг гуруҳ босқичидаги якуний учрашувини ўтказиб юборган. Шундан сўнг FIFA 40 ёшли ҳужумчига уч ўйинга дисквалификация берилганини тасдиқлади. Бироқ ташкилот ушбу жазони икки ўйинга, такрор қоидабузарлик содир этилмагунича шартли равишда тўхтатиб қўйди.

“FIFA Тартиб-интизом кодексининг 27-моддасига мувофиқ, қолган иккита ўйиннинг ижроси бир йиллик синов муддати билан тўхтатилди. Агар Криштиану Роналду синов муддати давомида шунга ўхшаш хусусият ва оғирликдаги қоидабузарлик содир этса, тўхтатилган дисквалификация автоматик тарзда кучга киради ва икки ўйинлик жазо Португалия терма жамоасининг кейинги расмий ўйинларида қўлланилади”, дейилади FIFA баёнотида.

FIFA таъкидлаган 27-модда ташкилотнинг суд органларига жазо чораларини тўлиқ ёки қисман тўхтатиб туриш ҳуқуқини беради. Бироқ баёнотда тақиқнинг айнан нима сабабдан юмшатилгани батафсил изоҳланмаган.

Шу тариқа, Саудия Арабистонининг “Ал-Наср” клуби шарафини ҳимоя қилаётган ва июнь ойида шартномасини 2027 йилгача узайтирган Роналду ўзининг олтинчи Жаҳон чемпионатининг дастлабки учрашувларида майдонга тушади.

Эслатиб ўтамиз, аввалроқ Криштиану Роналду ва Жоржина Родригесларнинг узоқ кутилган тўй маросими Роналдунинг туғилган шаҳри Фуншалда бўлиб ўтиши, никоҳ маросими 2026 йилги Жаҳон чемпионатидан кейин ёзда Фуншал католик черковининг йирик марказий ибодатхонасида ўтказилиши, зиёфат эса ҳашаматли меҳмонхонада давом эттирилиши ҳақида хабар берилган эди.