Роналдунинг тўйи қачон ва қаерда бўлиши айтилди

Дунёнинг энг машҳур жуфтликларидан бири – Криштиану Роналду ва Жоржина Родригесларнинг узоқ кутилган тўй маросими Роналдунинг туғилган шаҳри Фуншалда бўлиб ўтади. Никоҳ маросими 2026 йилги Жаҳон чемпионатидан кейин ёзда Фуншал католик черковининг йирик марказий ибодатхонасида ўтказилиши, зиёфат эса ҳашаматли меҳмонхонада давом эттирилиши айтилмоқда. Бу ҳақда “Jornal da Madeyra” хабар берди.

Аввалроқ, 40 ёшли португалиялик футболчи Криштиану Роналду жорий йилнинг август ойида узоқ йиллардан бери бирга бўлган севгилиси Жоржина Родригесга турмуш қуришни таклиф қилганини ижтимоий тармоқларда маълум қилган эди.

Роналду ва Жоржина 2016 йилдан бери бирга. Улар Роналду “Реал Мадрид” сафида тўп сураётган, Жоржина эса Мадриддаги Gucci дўконида ишлаган пайтда танишган. Уларнинг муносабатлари 2017 йил бошида, илк фарзандлари Алана Мартина дунёга келган йили оммага ошкор бўлган эди.

Маълумот учун, Криштиану Роналду беш фарзанднинг отаси ҳисобланади. Унинг тўнғич ўғли Криштиану Жуниор 2010 йилда, эгизаклари Эву ва Матео эса 2017 йилда туғилган. Роналду ва Жоржина Родригеснинг қизлари Алана Мартина 2017 йилда, энг кенжа фарзандлари Белла Эсмеральда эса 2022 йилда дунёга келган.

Эслатиб ўтамиз, аввалроқ Португалия терма жамоаси ва Саудиянинг “Ал-Наср” футбол жамоаси сардори Криштиану Роналду ва Жоржина Родригес Саудия Арабистони валиаҳд шаҳзодаси ва Бош вазири Муҳаммад бин Салмоннинг АҚШга ташрифи муносабати билан Оқ уйда бўлиб ўтган тантанали кечки овқатда қатнашган эди.