Россия ва Украина Запорожье АЭС ҳудудида ўт очишни тўхтатишга келишди

Россия ва Украина Халқаро атом энергетикаси агентлиги (МАГАТЭ) воситачилигида Запорожье атом электр стансияси ҳудудида ўт очишни тўхтатиш бўйича келишувга эришди. Бу ҳақда МАГАТЭ сайтида эълон қилинган баёнотда сўз боради.

Агентлик раҳбари Рафаэль Гроссининг маълум қилишича, бу жорий йил 2 январь куни ҳарбий ҳаракатлар оқибатида шикастланган сўнгги захира электр узатиш линиясини таъмирлаш ишларини бошлаш имконини беради.

Шунингдек, Гросси украиналик электр тармоқлари операторининг техник мутахассислари яқин кунларда ишларни бошлашини билдирган. Фронт чизиғи яқинида олиб бориладиган таъмирлаш жараёнини агентлик вакиллари кузатиб боради, улар аллақачон Вена шаҳридан йўлга чиққан. Гроссининг эслатишича, мазкур келишув Запорожье АЭС ҳудудида эришилган тўртинчи ўт очишни тўхтатиш келишуви бўлиб, МАГАТЭнинг воситачи сифатидаги ролини намоён этади.

Шу билан бирга, Украинадаги энергетика инфратузилмасига ҳужумлар давом этаётган бир пайтда, МАГАТЭ янги экспертлик миссиясини тайёрламоқда. Унинг мақсади ядро хавфсизлиги учун муҳим бўлган ва реакторларни совитиш тизимларини электр энергияси билан таъминлайдиган ўнта муҳим электр подстансиясини инспекция қилишдан иборат бўлади.

Маълумот учун, Энергодар шаҳрида жойлашган Запорожье атом электр станцияси уруш бошланишидан аввал Украинанинг умумий электр энергияси ишлаб чиқаришининг қарийб 20 фоизини таъминлаб, Европадаги энг йирик АЭС ҳисобланган. У 2022 йил март ойида Россия қўшинлари томонидан эгаллаб олинган, ўша йилнинг сентябрида эса унинг барча олти энергоблоки “совуқ тўхташ” ҳолатига ўтказилган. Тўхтатилганига қарамай, реакторлар доимий совитишни талаб қилади, бу эса ташқи электр тармоғи ёки захира дизел генераторлари орқали таъминланади. Россия томонидан бошланган уруш давомида стансия бир неча бор ўққа тутилган.

Эслатиб ўтамиз, аввалроқ Украина Энергетика вазири Денис Шмигаль Олий Рада мажлисидаги чиқишида уруш бошланганидан бери Россия армияси зарбасига учрамаган бирорта ҳам электростанция қолмаганини айтган эди.