Россияда ҳарбий самолёт қулаб тушди. Қурбонлар бор

Кеча, 13 ноябрь куни Россия таркибидаги Карелия Республикасида ўқув парвози вақтида Су-30 ҳарбий самолёти қулаб тушди. Ҳодиса оқибатида экипаж аъзоларининг ҳеч бири тирик қолмаган. Самолёт одамлар яшамайдиган ҳудудга қулаган. Бу ҳақда Карелия раҳбари Артур Парфенчиков ўзининг Telegram-каналида маълум қилди. 

“Прионежский туманида ҳарбий самолёт қулагани ҳақида маълумот олдим. Карелиянинг тезкор хизматларини ҳалокат жойига юбордим”, деб ёзган у.

Кейинчалик, самолёт қулаши оқибатида икки нафар экипаж аъзоси ҳалок бўлгани маълум қилинган. Самолёт ўқув-машғулот парвозини бажараётган бўлган. Аҳоли орасида зарар кўрганлар йўқ. У аҳоли пунктларидан ташқаридаги ўрмон ҳудудига қулаган. Ҳалок бўлган учувчилар 159-авиация қирувчи полкининг ҳарбий хизматчилари бўлган.

“Ҳалок бўлганларнинг яқинлари ва қариндошларига чин дилдан ҳамдардлик билдираман. Уларга зарур ёрдам кўрсатамиз”, дейди Парфенчиков.

Ҳозирда самолётнинг қулаши сабаблари аниқланмоқда.

Эслатиб ўтамиз, жорий йилнинг 11 ноябрь куни Туркия ҳарбий самолёти Грузия ҳудудида ҳалокатга учраган эди. Туркия ҳукумати расмий равишда ҳодиса оқибатида 20 нафар ҳарбий хизматчи ҳалок бўлганини тасдиқлаган. Барча учувчиларнинг жасадлари ҳодиса жойидан топилган. Ҳозирда Туркияда ҳалок бўлган самолёт уриб туширилган бўлиши мумкинлиги тахмин қилинмоқда. Шу вақт ичида мамлакатда С-130 самолётларининг парвози тўхтатилган.