Россияда мигрантларнинг болалари учун мактабларни пулли қилиш таклиф этилди

Россияга борган чет элликларнинг болалари рус мактабларида ёши ва синфидан қатъи назар, фақат тўлов асосида ўқишлари керак. Бу ҳақда Давлат думасининг Меҳнат, ижтимоий сиёсат ва фахрийлар ишлари бўйича қўмитаси раиси Ярослав Нилов ўзининг Telegram-каналида ёзди.

“Мигрантларнинг фарзандлари ёши ва синфидан қатъи назар, тўлов асосида ўқиши керак”, дея ёзган Нилов.

Шунингдек, у рус тили имтиҳонидан ўтишга уринишлар сонини 3 тагача чеклашни таклиф қилди. Ушбу қоидалар илгари рад этилган қонун лойиҳасининг янгиланган таҳририга киритилган. Ниловнинг сўзларига кўра, ҳужжат фракциялараро мақомга эга бўлган Давлат думасига тақдим этиш учун тайёрланмоқда.

“Рус тилини ўрганишда қийналаётган, вояга етмаган мигрант болалар ва дарс бераётган ўқитувчиларимизнинг асабларини асрайлик. Болалар уйда ота-онасини кутишсин ёки махсус дастурлар бўйича тўлов асосида ўқишсин”, дея хулоса қилган депутат.

Депутат Ярослав Нилов 2024 йилнинг сентябрь ойида Россия фуқаролиги бўлмаган шахсларнинг болалари учун боғча ва мактабларда бепул таълим олишни бекор қилувчи қонун лойиҳасини ишлаб чиққанди. Қонун лойиҳасида “Россия Федерацияси таълим тўғрисида”ги қонунига ўзгартириш киритиш таклиф қилинганди. Унга кўра, чет эллик болалар учун мактабгача, бошланғич умумий, асосий умумий ва ўрта умумий таълим пулли асосда амалга оширилади. Ҳозир уларнинг барчаси бепул асосда таълим олмоқда.

Расмий маълумотларга кўра, мамлакатдаги мактабларда қабул компанияси жорий йилнинг апрель ойида бошланган. Тест синовлари бошланганидан бери 1762 нафар бола ҳужжат топширган. Улардан 335 нафари имтиҳонга қўйилган. Шундан 44 нафари тестда қатнашиб, бор-йўғи 27 нафари имтиҳондан муваффақиятли ўтган. Бу эса умумий ариза берувчиларнинг 1,5 фоизини ташкил этади.

Давлат думаси спикери Вячеслав Володин бу ҳолатни Россияда қабул қилинган янги қонунларнинг самараси сифатида баҳолаган. Унинг таъкидлашича, ҳозиргача миграцияни назорат қилиш мақсадида 15 та қонунчилик ташаббуси қабул қилинган ва уларнинг барчаси кучга кирган.

Хабар қилинишича, мигрантлар учун рус тилидаги тестлар, шу жумладан оғзаки қисм 1-синфдан 11-синфгача бўлган ҳар бир ўқув босқичи учун алоҳида ишлаб чиқилган. Мактабга кириш учун номзод 90 фоиз тўғри жавобларга эга бўлиши керак.

Қабул қилинган федерал қонунга кўра, мигрант болаларни Россия Федерацияси ҳудудида қонуний яшаётганлик ҳолати текширилмасдан, шунингдек, тест синови орқали тасдиқланган рус тилини етарли даражада билмасдан туриб умумий ўрта таълим муассасаларига қабул қилиш тақиқлангани айтиб ўтилган.

Эслатиб ўтамиз, ўтган йилнинг декабрь ойида Россия Президенти Владимир Путин рус тилини билмайдиган мигрант болаларнинг мактабларда ўқишини тақиқловчи қонунни имзолаганди. Ушбу лойиҳа чет эл фуқаролари фарзандларининг Россия таълим тизимида ўқиши, шу жумладан, тил диагностикаси ва мослаштириш дастурларини ўрганишига қаратилган. Мониторинг Россия Таълим вазирлиги ташаббуси билан ташкил этилган.