Россиялик хакерлар Франциядаги йўловчи паромга ҳужум қилди – ОАВ

Россия махсус хизматлари дунёдаги энг йирик контейнер ташиш компаниясига тегишли бўлган кемага киберҳужум уюштирган бўлиши мумкин. Ушбу ҳужум Франциянинг жанубидаги Сет портидан паром жўнаб кетишини бир кунга кечиктирган. Сўнгги икки ой ичида кемада борт компьютерига уланган қурилма иккинчи бор аниқланган. Бу ҳақда масаладан хабардор манбаларга таяниб, “Bloomberg” хабар берди.

Нашрнинг ёзишича, MSC – Mediterranean Shipping Company’га қарашли Grandi Navi Veloci компаниясининг пароми билан боғлиқ ҳодисани Франция ва Италия расмийлари тергов қилмоқда. Уларнинг баҳосига кўра, тизимни бузиб киришга уриниш ортида Россия ҳарбий разведкаси турибди. Бу хулоса киберкриминалистик экспертиза натижаларига, шунингдек хакерлар томонидан қўлланилган воситалар, усуллар ва процедураларнинг АҚШ махсус хизматлари, жумладан ФҚБ ва АҚШ Киберхавфсизлик ва инфратузилма хавфсизлиги агентлиги ҳисоботларида тасвирланган фаолият билан мос келишига асосланган. Россия ҳарбий разведкаси Бош штаби таркибидаги 29155-ҳарбий қисм хакерлари бундай операцияларни аввал ҳам амалга оширган.

Йўловчи паром жорий йилнинг 13 декабрь куни Жазоирга йўл олиши керак бўлган, бироқ Франция расмийлари унинг операцион тизими бузилмаганига ишонч ҳосил қилиши учун сафар кечиктирилган. Кема 14 декабрь куни эрталаб портни тарк этган.

Хакерлар паромнинг офис компьютер тармоғига киришга уринган, бу уларга ўзларини қонуний фойдаланувчилар сифатида кўрсатиш имконини берган бўларди. “Bloomberg” манбаларининг айтишича, улар операцион тизимларга кира олмаган, бунга бу тизимларнинг офис тармоғидан алоҳида ажратилгани сабаб бўлган.

Франциянинг “Le Parisien” нашрининг хабар беришича, паромда борт компьютерига уланган ва уяли модем орқали интернет билан таъминланган Raspberry мини-компьютери топилган, бу хакерларга масофадан туриб кириш имконини берган. Шунга ўхшаш ҳолат ноябрь ойида ҳам айни шу паромда содир бўлган – ўшанда ҳам чекланган ҳудудда борт компьютерига уланган Raspberry қурилмаси аниқланган. Хавфсизлик сигнализацияси ишга тушгач, қурилма олиб ташланган ва криминалистик текширувга юборилган.

Маълумот учун, дунёдаги энг йирик контейнер флотини бошқарувчи MSC Европа, Осиё ва АҚШни боғловчи халқаро савдо бозорининг асосий иштирокчиларидан бири ҳисобланади. “Bloomberg”нинг ёзишича, шу сабабли унинг паромига қилинадиган киберҳужумлар глобал хавфсизликка жиддий таҳдид солади. Хакерлар ҳаракатлари таъминот занжирларига путур етказиши, муҳим инфратузилмага хавф туғдириши ва махфий ҳарбий ҳамда тижорий маълумотларнинг ошкор бўлишига олиб келиши мумкин.

Эслатиб ўтамиз, аввалроқ Германия расмийлари Россия мамлакатнинг муҳим инфратузилмасига қарши гибрид ҳужумларни кучайтирганини маълум қилиб, бунинг оқибатида Россияни янги чоралар, жумладан, россиялик фуқароларга кириш тақиқи ва уларнинг активларини музлатиш каби санкциялар кутаётганини билдирганди.