Садир Жапаров футбол ўйнади, танаффусда эса ҳужжатларни имзолади (видео)

Бугун, 13 декабрь куни Қирғизистон пойтахти Бишкек шаҳрида мамлакат Президенти Садир Жапаров ҳам иштирок этаётган анъанавий “Мурас” футбол турнирининг биринчи куни якунланди. Бу ҳақда “24.kg” хабар берди.

Ўтказилган учрашувлар якунига кўра, “Президенттин командаси” турнирнинг чорак финалига йўл олган. Жамоа “Аймактар” ва “Фемида” терма жамоаларини мағлуб этган, “Элчилер” жамоасига эса ютқазган.

Чорак финалда, шунингдек, “Достук”, “Онор”, “Аймактар”, “Спорт чеберлери”, “Ийман”, “Иш башкармаси” ва “Ден соолук” жамоалари ҳам иштирок этади. Турнир эртага, 14 декабрь куни давом эттирилади.

Президент Садир Жапаров “Мурас” анъанавий футбол турнирида Президент Администрацияси ходимлари, Вазирлар Маҳкамаси аъзолари ҳамда давлат органлари ва идоралари раҳбарларидан иборат жамоа сафида майдонга тушмоқда.

Шу билан бирга, учрашувлар орасидаги танаффусларда Қирғизистон раҳбари иш фаолиятини ҳам давом эттирмоқда. Хусусан, у ҳужжатлар билан ишлаяпти ва давлат органлари раҳбарларини қабул қилмоқда.

Эслатиб ўтамиз, жорий йилнинг май ойида Садир Жапаров “Президенттин командаси” билан “Мурас” турнирининг учинчи ўрнини эгаллаган эди. Улар 200 минг сом (тахминан 27 млн сўм) пул мукофоти билан тақдирланган.