Шавкат Мирзиёев ва Владимир Путин Ўзбекистондаги АЭС қурилишига старт беради

Ўзбекистон Президенти Шавкат Мирзиёев ва Россия Президенти Владимир Путин жорий йилнинг 4 июнь куни Ўзбекистонда Россиянинг “Росатом” корпорацияси томонидан барпо этилаётган АЭСнинг биринчи энергоблоки қурилишини бошлаб беришни режалаштирмоқда. Бу ҳақда бугун, 2 июнь куни Россия раҳбарининг ёрдамчиси Юрий Ушаков маълум қилди.

Унинг билдиришича, Президентлар Санкт-Петербург иқтисодий форуми доирасида учрашади ва видеоалоқа орқали Ўзбекистондаги илк АЭС қурилишига “яшил чироқ” ёқади.

“Президент Мирзиёевнинг форумда иштирок этиши муносабати билан, табиийки, икки томонлама учрашув ҳам ўтказилади. У 4 июнь куни кечқурун Константинов саройида бўлиб ўтади”, дейди Ушаков журналистларга.

У Ўзбекистон ва Россия раҳбарлари ўртасидаги музокараларнинг бошланиши рамзий маънога эга бўлишини қайд этган. 

“Учрашув анча рамзий ва қизиқарли тарзда бошланади – икки раҳбар Ўзбекистонда интеграциялашган атом электр станциясининг биринчи энергоблоки қурилиши бошланишига бағишланган видеоконференцияда иштирок этадилар”, дейди Россия Президентининг ёрдамчиси.

Ушаков бу лойиҳа икки мамлакатнинг энг йирик ва етакчи лойиҳаси эканлигини қайд этган.

“Маросим давомида раҳбарлар Константинов саройида бўлишади, қурилиш майдончасида эса уларни, хусусан, МАГАТЭ Бош директори Рафаэль Гросси, “Росатом” бош директори Алексей Лихачев ва “Ўзатом” агентлиги раҳбари Азим Аҳмедхўжаевлар қутлашади”, дейди у.

Маълумот учун, томонлар Ўзбекистонда атом қувватини яратиш бўйича ҳукуматлараро битимни 2018 йилда имзолаган. Унда ҳар бирининг қуввати 1,2 гигаватт бўлган иккита энергоблок қуриш кўзда тутилган. 2025 йилда томонлар ҳар бири 55 мегаватт қувватга эга бўлган олтита кичик блок қуришга келишиб олган, бироқ кейинроқ лойиҳани ўзгартиришга қарор қилинди ва 2026 йилнинг мартида шартномага тузатиш киритилди.

Янги келишувга кўра, “Росатом” Ўзбекистонда Россиянинг ВВЭР-1000 реакторлари асосида иккита йирик қувватли энергоблок ва РИТМ-200 реакторлари асосида ҳар бири 55 мегаватт қувватга эга бўлган иккита кичик атом блокларини қуради. Ушбу станция Россия томонидан хорижда қурилган биринчи кичик қувватли АЭС бўлиши мумкин.

Ҳозирги вақтда Марказий Осиёнинг бешта давлатидан ҳеч бирида АЭС мавжуд эмас. Ўтган йилнинг июнь ойида Қозоғистон мамлакатдаги илк АЭС қурилиши учун “Росатом”ни халқаро консорциум раҳбари сифатида танлаган (унда Россия корпорациянинг флагмани ҳисобланган “3+” авлодга мансуб ВВЭР-1200 реакторидан фойдаланишни режалаштирмоқда). Жорий йилнинг май ойида эса Москва ва Остона қуввати 2,4 гигаватт, қиймати тахминан 16,5 миллиард долларни ташкил этиши мумкин бўлган “Балхаш” АЭСни қуриш бўйича ҳукуматлараро битим имзолаган.

Эслатиб ўтамиз, аввалроқ Атомстройэкспорт” АЖ (“Росатом”нинг инжиниринг бўлинмаси) вице-президенти, Ўзбекистонда АЭС қуриш лойиҳаси директори Павел Безруков Ўзбекистондаги АЭС майдончасида ишлашга қарор қилган маҳаллий ва Россия-Ўзбекистон қўшма корхоналарига максимал даражада имтиёзлар берилишини айтган эди.