Швеция Европа давлатларини “уруш режими”га киришга чақирди

Швеция Мудофаа вазири Пол Йонсон Европа “уруш режими”га кириши кераклигини айтди. Бу ҳақда у Германиянинг RND нашрига берган интервьюсида айтиб ўтди.

“Тинчликни сақлаш учун биз уруш эҳтимолига ҳам маънавий, ҳам ҳарбий жиҳатдан тайёр бўлишимиз керак. Менталитетни ўзгартириш зарур: биз тинчликни қатъият билан тўхтатиш, ҳимоя қилиш ва сақлаш учун уруш режимига ўтишимиз лозим”, деди у.

Унинг сўзларига кўра, швецияликларнинг тахминан 90 фоизи Украинага ёрдамни сақлаб қолиш ёки кенгайтиришни қўллаб-қувватлайди, аксарияти эса мудофаа харажатларини оширишни маъқуллайди. 

Вазирнинг таъкидлашича, Россия ва Украина ўртасидаги зиддиятни ҳал қилиш учун Киевга ҳарбий ёрдамни кучайтириш ва Москвага қарши санкцияларни кучайтириш зарур.

У, шунингдек, сентябрь ойида Польша ҳаво ҳудудида дронлар пайдо бўлишига изоҳ бериб, НАТО давлатлари Россия томонидан эҳтимолий эскалацияга қарши туриш учун қўшимча чоралар кўриши кераклигини таъкидлади.

Йонсоннинг қўшимча қилишича, иттифоқ ҳаво ёки денгиз чегараларини ноқонуний кесиб ўтса, дрон ва кемаларга қарши жавоб қайтариши мумкин.

Эслатиб ўтамиз, аввалроқ Швеция ҳукумати Украинага 110 миллион доллардан ортиқ қийматга эга янги қишки ёрдам пакетини тақдим этиши ҳақида хабар берилганди.