Швейцария Трампни қимматбаҳо совғалар билан авради

Швейцария АҚШ Президенти Дональд Трампни рози қилиш ва мамлакатга қўйилган бож ставкаларини камайтириш учун саноат етакчиларидан иборат делегацияни АҚШга юборди. Бу ҳақда “Axios” хабар берди.

Делегация Трампга Rolex компаниясининг стол усти соати ва 1 килограммлик олтин қуймасини совға қилган. Олтин қуйманинг устига Трампнинг президентлик даврларига ишора қилиб 45 ва 47 рақамлари ўйиб ёзилган. Совғалар 4 ноябрь куни Вашингтонга ташриф чоғида топширилган.

Трамп 2025 йил август бошида Швейцария ва яна 64 мамлакатга қарши божларни жорий қилган эди. Швейцария учун бож ставкаси 39 фоиз қилиб белгиланган бўлиб, бу Европадаги энг юқори кўрсаткичлардан бири ҳисобланади.

“Financial Times” манбаларига кўра, божлар эълон қилинишидан бир кун олдин Швейцария Президенти Карин Келлер-Зуттер Трампга қўнғироқ қилган, аммо суҳбат “жуда ёмон” бўлган. Трамп ОАВга берган интервьюсида: “Аёл ёқимтой эди, лекин мени тингламади”, деган.

Юқори даражадаги музокаралар самара бермагач, Швейцария тактикасини ўзгартирган ва 4 ноябрь куни бизнес етакчилари делегациясини Оқ уйга юборган. 

Делегация таркибида қимматбаҳо металлар савдоси билан шуғулланувчи MKS SA компанияси раҳбари Марван Шаркий, Rolex раҳбари Жан-Фредерик Дюфур, Richemont раиси Йоханн Руперт, Mercuria трейдинг компанияси ҳаммуассиси Даниэль Ягги бўлган.

Нашрнинг ёзишича, совғалар ва учрашув Трампга ёққан. 

“Швейцариянинг юқори мартабали вакиллари билан учрашганим катта шараф бўлди. Энг муҳим мавзу – савдо ва савдо номутаносиблигини муҳокама қилдик. Учрашувда қатнашганларнинг барчасини ажойиб ишлари учун мақтамоқчиман”, дея пост қолдирган Оқ уй раҳбари. 

Оқ уй вакиллари Трамп совғаларни ўз номига эмас, Президент кутубхонаси номидан қабул қилганини, шу боис бу қонуний бўлганини таъкидлаган.

Қўшимча қилинишича, Швейцария ўз мақсадига эришган. 14 ноябрь куни АҚШ Швейцария маҳсулотларига қўйилган божларни 39 фоиздан 15 фоизгача туширди. Бунга жавобан, Швейцария савдо тўсиқларини юмшатишга ва мамлакат компаниялари АҚШга кўпроқ инвестиция киритишга рози бўлган. 

Маълумот учун, АҚШ қонунчилигига кўра, давлат хизматчилари, жумладан, Президент ҳам, чет эл етакчиларидан қиммат шахсий совғалар ололмайди. Улар 480 долларгача бўлган совғаларни ўзида қолдириши мумкин. Ундан қиммати эса миллий архивга топширилади.