Словакияда поездлар тўқнашди. Ўнлаб одамлар жароҳат олди (видео)

Кеча, 9 ноябрь оқшомида Словакиянинг Братислава ва Пезинок шаҳарлари орасидаги темирйўл участкасида икки йўловчи поезди тўқнашди. Ҳалок бўлганлар йўқ, бироқ ўнлаб одамлар жароҳатланган, хусусан, 20 киши шифохонага ётқизилган. Бу ҳақда “Denník N” хабар берди. 

Қайд этилишича, поездлардан бири иккинчисининг орқа қисмига урилган. Бир поезд Братиславадан, иккинчиси эса Нитрадан йўлга чиққан бўлган.

“Соат 19:31 да 158-линияга Пезинок-Братислава участкасида икки поезд тўқнашгани ҳақида хабар келиб тушди. Барча фавқулодда хизматлар воқеа жойига юборилди”, дейилади расмий маълумотда.

“Denník N” нашрининг ёзишича, бир неча киши жароҳат олган, айрим тез ёрдам машиналари Братиславага йўл олган. Кўплаб йўловчилар чамадонларини олиб, яқин атрофдаги супермаркет томонга кетган.

Нашрнинг темирйўл хизмати маълумотига таяниб ёзишича, тўқнашув юзма-юз бўлмаган, чунки ҳар иккала поезд бир йўналишда ҳаракатланаётган бўлган. Ҳодиса сабаблари аниқланмоқда. Темирйўл ходимлари тўқнашув содир бўлган участкани вақтинча ёпилиши мумкинлигини ҳам истисно этмаган.

“Мен барча йўловчиларнинг аҳволи яхши бўлишига қатъий ишонаман”, дейди Словакия Ички ишлар вазири Матуш Шутай-Эшток.

Эслатиб ўтамиз, шу йилнинг октябрь ойида Словакиянинг шарқидаги Рожнява шаҳри яқинида ҳам икки тезюрар поезд тўқнашган эди. Ўшанда камида 100 киши енгил жароҳат олган, полиция бу икки поезд қарама-қарши йўналишда ҳаракатланганини билдирган.